Shqiptarët, më shumë internet se telefoni – AKEP: 2.1 milionë përdorues me akses të shpejtë në 2021. Rritje vjetore me 17.5%

Shqiptarët po orientohen gjithnjë e më shumë nga përdorimi i celularëve për shërbimet e internetit sesa të telefonisë. Agjencia e Komunikimeve Elektronike dhe Postare raporton se në tremujorin e tretë të këtij viti numërohen më shumë se 2 milionë shqiptarë që kanë akses në shërbimet e internetit të shpejtë, me një rritje të dukshme krahasuar me vitin e shkuar. Në raportin e sapopublikuar mbi këtë treg, AKEP bën me dije se numri i përdoruesve aktivë të aksesit broadband në Internet nga rrjetet celulare në T3 2021 ishte rreth 2.1 milionë që përbën një rritje me 11.1% me tremujorin e mëparshëm, dhe një rritje me 17.5% në krahasim me Tremujorin e tretë 2020.

Ndërkaq, rënie ka shënuar numri I kartave SIM në treg, si dhe konsumi mesatar mujor për përdorues. Numri i pajtimtarëve të shërbimeve celulare sipas kartave SIM në fund të T3 2021 ishte rreth 3,406,461 që përbën një rritje me 6.8% në krahasim me tremujorin e mëparshëm, dhe një rënie me 0.8% në krahasim me T3 2020; – Numri i përdoruesve aktivë të telefonisë celulare gjatë T3 2021 arriti në rreth 2.66 milionë që përbën një rritje me rreth 8.3% me T2 2021 dhe rritje me rreth 9% me T3 2020.

Konsumi mesatar mujor për përdorues aktiv i shërbimeve celulare gjatë T3 2021 ishte: 185 minuta dalëse, 18 SMS dhe 6.94 GB Internet. Krahasuar me T2 2021, konsumi mesatar i thirrjeve pati një rënie me 3.8%, konsumi mesatar i SMS-ve pati një rënie me 6.1% dhe konsumi mesatar i internetit u rrit me 16.7%.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.