Shqiptaret, nënat më të reja – Eurostat: Rekord me moshën 25.7 vite, 85% përpara moshës 30-vjeçare
Femrat shqiptare, në krahasim me ato europiane, të çdo shteti tjetër të kontinentit, janë ato që bëhen nëna më shpejt. Sipas një publikimi të fundit të Eurostat, femrat shqiptare bëhen nëna për herë të parë në moshën 25 vjeçare. Mosha mediane e vlerësuar nga zyra europiane e statistikave vlerësohet në 25.7 vite, ndërkohë që për Bashkimin Europian kjo normë fiksohet në 29 vjeç.
Madje, Shqipëria ka edhe një tjetër rekord. Të pasurit fëmijën e parë pas moshës 30 vjeçare, në Shqipëri është disi e rrallë, pasi vetëm 15% e femrave në vend klasifikohen në këtë kategori. Në Bashkimin Europian ndërkohë, kjo normë fiksohet në 45%. Pra, siç duket mjaft qartë, ndryshimi me Europën është i tejskajshëm, madje edhe me fqinjët rajonalë.
Situata është rrjedhojë e drejtpërdrejtë e mentalitetit si dhe arsimit të dobët. Shqipëria në këtë renditje ndiqet nga Bullgaria dhe Rumania, me një moshë mediane respektivisht në 26 dhe 26.4 vite. Të dhënat e Eurostat i referohen vitit 2016.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.