Shqiptarët nuk i ndahen Francës – Rreth 1500 azilkërkues në T2 të 2018-ës, më pas vjen Greqia

Franca vijon të jetë vendi i preferuar i shqiptarëve azilantë. Këta të fundit janë ende një fenomen i përhapur dhe një problem për Europën. Numërohen rreth 1500 shqiptarë që kanë bërë kërkesë për azil për herë të parë në Francë gjatë tremujorit të dytë të 2018-ës.

Shqiptarët janë kështu të dytët pas afganëve sa i përket azilkërkuesve në Francë. Këtë e thotë Eurostat.

Në vend të dytë ndërkohë, sa i përket destiancioneve më të preferuara të shqiptarëve qëndron çuditërisht Greqia, edhe ky një destinacion i ri, sa i përket kësaj lloj forme të emigrimit, pra kërkesës për azil.

Greqia ka qenë tradicionalisht një prej vendeve me rregullat më të ashpra në union sa i përket azilit, së bashku me Italinë, por shqiptarët duket se kanë përfituar nga vala e refugjatëve nga lindja e mesme që prej viti 2015.

Gjatë tremujorit të dytë të vitit numërohen 800 shqiptarë që kanë aplikuar për herë të parë për azil në Greqi. Në vend të tretë ndërkohë radhitet Britania e Madhe me rreth 500 kërkesa.

Franca e ka kthyer në çështje edhe diplomatike prezencën e lartë të shqiptarëve azilkërkues në territorin e saj. As premtimet e autoriteteve shqiptare e as masat e ndërmarra duket se nuk i`a kanë dal dot të frenojnë fenomenin.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.