Shqiptarët “pushtojnë” Dubrovnikun – Ndër vizitorët kryesorë të qytetit, kryesisht gjatë fundvitit
Shqiptarët janë ndër vizitorët kryesorë të qytetit të Dubrovnikut në Kroaci, i cili është kthyer furishëm në një prej destinacioneve më të rëndësishme turistike në Europë e sidomos në Ballkan.
Afërsia gjeografike ndërkohë bën që për shqiptarët të jetë një ndër destinacionet kryesore, pasi jo vetëm përkthehet në kosto më të ulëta udhëtimi, por edhe në lehtësi më të mëdha të kalimit kufitar.
Thuajse të gjitha agjencitë e udhëtimit e kanë Dubrovnikun në listën e tyre, së bashku me disa prej destinacioneve kryesore të Malit të Zi, si Budva apo Kotorri.
Qyteti mesjetar i Dubrovnikut është kthyer në një atraksion turistik përgjatë të 12 muajve të vitit.
Dhjetori ndërkohë, pa diskutim që tërheq shumë, dhe shqiptarët nuk kishin si të mungonin gjatë muajit të festave.
Të dhënat e fundit të INSTAT ndërkohë, konfirmojnë tendencën e shqiptarëve për të vizituar gjithmonë e më shumë vendet e rajonit.
Gjatë nëntorit numri i shqiptarëve që ka dalë nga vendi nëpërmjet kufijve rrugorë ishte 25.2% më i lartë se e njëjta periudhë e një viti më parë, ose 116 mijë persona më shumë.
Përgjatë 11 muajve ndërkohë, rritja fiksohet në vetëm 5.5%, çka konfirmon edhe njëherë tendencën për të udhëtuar më shumë gjatë muajve Nëntor-Dhjetor që përkojnë me periudhën e festave.
Gjerësisht daljet e shqiptarëve nëpërmjet kufijve tokësore kanë për destinacion vendet fqinjë, kryesisht Kosovën, Malin e Zi, Kroacinë, Maqedoninë dhe Greqinë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.