Shqiptarët rrisin shpenzimet – Qejfi kryeson rritjen, bien shpenzimet për ushqim. Tirana dhe Korça në krye
Shpenzimet mesatare për familjet shqiptare janë rritur në 82.236 lekë në muaj, nga 77.864 lekë që ishin në vitin 2018, thonë të dhënat më të fundit nga Instat, që sinjalizojnë një rritje të shpenzimeve mujore mesatare për familje prej rreth 4300 lekësh në muaj, ose 5.6% rritje krahasuar me vitin paraardhës. Rritja më e madhe vihet re në zërin e argëtimit, mbi 50%, si dhe në veshje apo pije alkoolike dhe duhan.
Kanë rënë ndërkohë, shpenzimet për ushqim dhe pije jo-alkoolike si dhe ato të transportit. Për rrjedhojë, edhe pesha e ushqimit në shpenzimet mujore të shqiptarëve ka rënë lehtë, nga rreth 44%, në rreth 41% në vitin 2019, tregojnë të dhënat e Instat. Sa i përket shpenzimeve për familje sipas qarqeve, Tirana është padiskutim e para, me rreth 98 mijë lekë për njësi ekonomike familjare, ndjekur nga Korça dhe Fieri, me 82 mijë dhe 79 mijë lekë shpenzime respektivisht. Tre qarqet e fundit të listës ndërkohë janë: Kukësi, Elbasani dhe Dibra, me 69 mijë, 68 mijë dhe 67 mijë lekë respektivisht
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.