Shqiptarët s`duan të mësojnë – Norma e tretë më e ulët në Europë e edukimit dhe trajnimit te të rriturit
Duket se edukimi në Shqipëri nuk është problem vetëm për të rinjtë. Të dhënat e sapo publikuara të Eurostat tregojnë se, Shqipëria ka normën e tretë më të ulët të pjesëmarrjes në edukim dhe trajnim të të rriturve në moshë pune, pra mes 25 dhe 64 vjeç.
Kjo normë në vendin tonë fiksohet në 9.2%. Siç e tregon qartë Eurostat, në Europë më keq se ne është vetëm Rumania me 7% dhe Bosnje Hercegovina me 8.7%. Pas Shqipërisë ndërkohë vjen Maqedonia me 12%, Serbia me 19.8%, e më pas të gjitha shtetet e tjera kanë një normë mbi 20%, e deri në 69.1% në rastin e Zvicrës.
Me një normë në vetëm 9.2%, pjesëmarrja e shqiptarëve të rritur në kurse edukimi apo trajnimi është 5 herë më e ulët se mesatarja e Bashkimit Europian. Në union, kjo mesatare fiksohet në 45.1%.
Pra, ndërkohë që në Bashkimin Europian 1 në 2 të rritur merr pjesë aktive në kurse trajnimi, në Shqipëri ky raport zbret në 1/10. Kurset mund të jenë formale ose jo formale, dhe në pjesën dërrmuese i referohet atyre që lidhen me profesionin. Por në shumë raste janë edhe kurse që lidhen me aftësi apo talente të tjera që mund të ketë dikush.
Pjesëmarrja mjaft e ulët e shqiptarëve në marrëdhënie pune në edukim apo trajnim të mëtejshëm, veç vullnetit të gjithsecilit është edhe reflektim i mungesave në treg, strukturës së tregut të punës, por edhe e mangësive në legjislacion, kodin e punës, planet e qeverisë. Ky fenomen më pas reflektohet në tregun e punës e për rrjedhojë edhe në nivelin e produktivitetit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.