Shqiptarët, të “dashuruar” me euron – Studimi i Bankës Qendrore të Austrisë: Më optimistët mes kandidatëve
Ndër të gjitha vendet kandidate dhe ato potencialisht kandidate për t`u bërë pjesë e Bashkimit Europian apo Eurozonës, Shqipëria dhe shqiptarët janë më optimistët sa i përket monedhës së përbashkët, Një studim i fundit i Bankës Qendrore të Austrisë tregon se shqiptarët janë optimistë më shumë se duhet, madje të parët mes të gjitha vendeve. Pak më shumë se 50% e tyre, janë të bindur se euro do të futet në qarkullim përpara se ç`është e mundur teknikisht. Gjithsesi, në 2019 kjo normë ka rënë ndjeshëm, duke pasur parasysh se në 2017-ën ishte gati 85%. Por, edhe këtu kemi një paradoks tjetër. Studimi i kryer në formën e një ankete nga Banka Qendrore e Austrisë tregon se, shqiptarët janë të vetmit mes vendeve në analizë ku pritshmëritë për përqafimin e euros si monedhë kombëtare janë rritur mes periudhës 2007-2019. Në të gjitha vendet e tjera, pritshmëritë kanë rënë. Shqiptarët janë gjithashtu ata që më pak besojnë ndër vendet kandidate për t`u bërë pjesë e eurozonës, se monedha e përbashkët nuk do të futet kurrë në vendin e tyre. Kjo normë është më e vogël se 10%.
Pritshmëritë e larta të shqiptarëve për euron duket se lidhen ngushtë edhe me “familjarizimin” e tyre të hershëm me monedhën e përbashkët. Raporti më fundit i Bankës së Shqiëprisë për 6-mujorin e parë të vitit sa i përket deuroizimit të ekonomisë, tregon se, krahasuar me një vit më parë, varësia e ekonomisë ndaj euros ka rënë minimalisht. “Gjatë gjysmës së parë të vitit 2020, pjesa më e madhe e treguesve nuk kanë njohur ndryshime të dukshme. Ndër to, raporti ‘aktive likuide në valutë ndaj pasiveve afatshkurtra në valutë’ ka njohur rënie të shpejtë gjatë kësaj periudhe, duke sinjalizuar rritje të rrezikut të likuiditetit në valutë.
Nga ana tjetër, vërehet një rënie e raportit ‘kredi në valutë të pambrojtura ndaj kursit të këmbimit ndaj totalit të kredive në valutë’, që sinjalizon ulje të rrezikut nga nënçmimi i kursit të këmbimit. Banka e Shqipërisë i qëndron opinionit se duhet më shumë kohë që masat të ndihen të plota dhe të arrihet në një përfundim lidhur me efektivitetin e tyre”-thuhet në raport. Shifrat e Bankës së Shqipërisë tregojnë se në 6 muajt e parë të vitit, pasha e kredive dhe depozitave në valutë në vendin tonë është rritur krahasuar me dhjetorin e vitit të kaluar, ndërkohë që ka rënë në mbi 8% treguesi i likuditetit në valutë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.