Shqiptarët të “etur” për birrë – Rritet importi me 36% gjatë qershorit, 6.4 milionë litra

Ardhja e muajve të ngrohtë dhe sidomos e sezonit veror sjell edhe rritje të ndjeshme të konsumit të birrës në vendin tonë. Por, këtë vit, rritja duket edhe më e madhe. Të dhënat nga importet e birrës nga drejtoria e përgjithshme e doganave tregojnë se gjatë qershorit u importuan 6.4 milionë litra birrë në vendin tonë, nga rreth 2.7 milionë në muajin maj dhe nga rreth 4.7 milionë gjatë qershorit të një viti më parë. Në terma vjetorë rritja fiksohet në 36%. Shifra e qershorit, krahasuar me këtë periudhë kohore është krejtësisht e pazakontë.

Duke parë të dhënat historike të drejtorisë së doganave, rritja e importit në mbi 6 milionë litra në muaj është dukuri e muajve të kulmit të sezonit, korrik dhe gusht. Këtë vit, duket se kërcimi në importin e birrës pa nisur ende mirë sezoni veror është rrjedhojë e pandemisë, pra importeve të ulta gjatë muajve të izolimit, por ndoshta edhe e fakti se shqiptarët janë të “etur” për birrë më shumë se më parë.

Të dhënat e tjera të doganave sa i përket mallrave të akcizës tregojnë një rënie të lehtë të importit të kafes dhe cigareve gjatë qershorit, krahasuar me të njëjtën periduhë të vitit të kaluar. Te karburantet ndërkohë, rënia është e ndjeshme në terma vjetorë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.