Shqiptarëve u shtohet borxhi me 426 euro – Borxhi publik shkon 11.5 miliardë euro, rritet ndjeshëm në vitin 2022!

Stoku total i borxhit të shtetit shqiptar në 3 mujorin e parë të vitit ka arritur në afro 1.4 triliardë lekë apo 11.5 miliardë euro .

Referuar të dhënave zyrtare të Ministrisë së Financave, të zbardhura nga Tv SCAN,  ajo që vihet re është se borxhi publik ka pësuar një rritje të konsiderueshme nga viti në vit, ku në dekadën e fundit është dyfishuar. Gjithashtu, po ta krahasojmë me tremujorin e parë të 2021-shit, borxhi publik është rritur me afro 1.2 miliardë euro në harkun kohor të një viti.

E përkthyer për frymë, rezulton që çdo banor i Republikën e Shqipërisë është aktualisht “broxhli” 4116 euro, dhe krahasimisht me të njëjtën periudhë të një viti më pare kjo shifër është rritur në 426 euro. Referuar shifrave zyrtare,  gati gjysma e borxhit total të shtetit shqiptar është në monedhë të huaj, pra borxh i jashtëm, çka dhe sjell rreziqe për rritjen e kostos së tij për shkak të rritjes së inflacionit.

Konkretisht 5.7 miliardë euro është borxh  jashtëm dhe 5.8 miliardë euro borxh i brendshëm.  Stoku i borxhit publik në raport me Produktin e Brendshëm Bruto në 3-mujorin e parë të vitit llogaritet në 69.55 për qind, ndërsa vetëm interesat që paguan shteti shqiptar aktualisht, arrijnë në 11 miliardë lekë.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.