Shqiptari fiton ankandin e “Switcher” të falimentuar – Gati 500 mijë artikuj për tregun e Shqipërisë dhe Kosovës

Rreth gjysmë milioni artikuj të markës “Switcher”, kompani e cila falimentoi majin e kaluar, u blenë në ankand nga një biznesmen shqiptar.

Janë 467 mijë e 123 veshje të ndryshme, që sipërmarrësi me aktivitet në Bazel i bleu për vlerën e 250 mijë frangave, ose 235 mijë euro.

“Janë produkte me cilësi shumë të mirë. Është për të ardhur keq që “Switcher” falimentoi”, u shpreh Hasan Berisha në fund të ankandit.

Sipas biznesmenit, artikujt duhet të vijnë në Kosovë dhe Shqipëri: “I kemi gati blerësit, të cilët janë zotuar për të marrë mallin”, tha Berisha.

Çmimi sipas tij është pak i lartë, pasi ai ishte përgatitur të ofronte jo më shumë se 200 mijë franga për mallin e mbetur stok. Çmimi fillestar për artikujt ishte 50 mijë franga, ndërsa ishin të pranishme dhjetëra kompani import-eksporti.

Kompania e veshjeve “Switcher” ishte themeluar në vitin 1981 dhe konsiderohej një markë e cilësisë së lartë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.