Shtator 2018, nisin kurset profesionale në aviacion – Nga shërbim ndaj pasagjerit, teknik avionësh në kompani ajrore …

Shumë të rinj do të kenë mundësi të trajnohen në kurse profesionale në aviacion duke nisur nga muaji Shtator 2018. Memorandumi i Kooperimit është firmosur sot nga drejtori i Aviacionit Civil, Krislen Keri, Drejtori i Shkollës së Mesme profesionale “Harry Fultz”, Arian Kapedani, CEO i Aeroportit Ndërkombëtar “Nënë Tereza” Rolf Castro- Vasquez, menaxheri i kompanisë shqiptare “Albawings”, Gentian Kole dhe përfaqësuesi Federatës “Aeronautike Shqiptare”, Renis Tershana.

Programet profesionale do të ofrohen në disa sektorë të aviacionit, duke nisur me:

1. Shërbim ndaj pasagjerit në Aeroport
2. Shërbime të tokës në Aerorport
3. Personel kabine në kompani ajrore
4. Teknik avionësh në kompani ajrore

Kurset pritet të fillojnë në shtator të këtij viti, ndal palët do të angazhohen për përgatitjen e programeve të studimit dhe përmbushjen e kritereve teknike dhe fizike. Kapedani e cilësoi këtë nismë pozitive, e cila mudn të çojë në të ardhmen drejt programeve Bachelor dhe Masten në aviacion.

Ndërkohë, për përfaqësuesin e Federatës së Aeronautikës Shiptare, Tershana hapa të tillë ndihmojnë në përgatitjen e profesionistëve të rinj, i cili shtoi më tej se aviacioni shqiptar po shënon një rritje të dukshme nga kërkesat e larta turistike.

Duke u shprehur se industria e aviacionit po përballet me mungesë kapacitetesh njerëzore, sipas menaxherit të “Albawings”, Kole,  kjo nismë do të hapë një kapitull të ri për profesionistët në aviacion.

Ndërkohë, kreu i Aviacionit Civil, Keri tha AAC synon të krijojë një ambient të sigurt të aviacionit dhe për këtë formimi i specializuar profesional është edhe kushti bazë. Ndërkohë shtoi më tej se situata në fushën e aviacionit nuk është pozitive për shkak të mungesës së theksuar të kapaciteteve njerëzore.

“Situata aktuale në formimin profesional në fushën e aviacionit nuk është pozitive pasi nuk ekzistojnë mundësitë e edukimit për të rinjtë që janë të apasionuar dhe dëshirojnë të bëhen pjesë e aviacionit dhe krijimi i mundësive të tilla paraqet një mundësi më shumë për të rinjtë, që të bëhen pjesë e industrisë dhe për të dhënë në të ardhmen kontribute për industrinë vendase dhe jo vetëm. Patjetër që pas një shkollimi bazë dhe një eksperiencë pune në industri, të rinjtë do kërkojnë më shumë, për tu bërë pilota apo inxhinier aeronautik”, tha Keri.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.