Shtëpi për të pastrehët – Çdo investitor do të “falë” 50 m2 për sipërfaqe mbi 2000m2     

Komisioni i Shëndetësisë dhe i Çështjeve Sociale ka kërkuar më shumë kohë për tu njohur nen për nen me ligjin e ri për strehimin social. Ky ligj nëse do të miratohet ka pësuara ndryshime rrënjësore të tij, duke e ndryshuar atë në 90 për qind të tij.

Referuar financimit për strehimin social ligji i ri parashikon edhe kontributin e sektorit privat.

Kështu në nenin 20 thuhet se çdo ndërtues i cili për arsye përfitimi kryen ndërtime me sipërfaqe ndërtimore banimi, mbi 2 000 metra katrorë, siguron kalimin pa shpërblim të paktën 50 metrave katrorë sipërfaqe funksionale  në favor të fondit publik të banesave sociale me qira.

Për banesat sociale me qira ligji parashikon edhe subvencionim të qeras për familjet në nevojë.

Ndërsa referuar banesave me kosto të ulët ato sigurohen nëpërmjet blerjes nga publiku apo private në ankand ku vlera e tyre do të jetë me e vogël se 40% e vlerës reale të tregut. Për këto blerje familjeve në nevojë do t’ju sigurohen grante të menjëhershme si dhe subvencionim për  interesat e kredisë.

Banesat e specializuara financohen me fondet e buxhetit të shtetit, të vetëqeverisjes vendore ose me bashkëfinancim, nëpërmjet donacioneve e kredive të institucioneve publike apo private.

Ndërsa të ardhurat e grumbulluara nga qiratë e banesave të specializuara shkojnë në favor të këtij programi, për mirëmbajtjen e tyre.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.