Shteti i vogël shqiptar – Vetëm 11.8% e të punësuarve në administratë, të parafundit në Europë
Në Shqipëri, sipas të dhënave të vitit 2017, ka 164 mijë të punësuar në administratë, pra atë qendrore dhe atë lokale. Në totalin prej 1.385.000 të punësuarish gjithsej në vend, rezulton se shqiptarët që punojnë në shtet zënë vetëm 11.8% të atyre që janë në marrëdhënie pune. Por si është kjo normë krahasuar me Bashkimin Europian dhe vendet më të zhvilluara? Bindshëm e ulët, dhe për ta ilustruar këtë mjafton të themi që mesatarja e Bashkimit Europian fiksohet në 16%.
Në krye të listës në Europë janë vende si Suedia, Finlanda apo Danimarka, me normën në 29%, 28% dhe 25% respektivisht. Më pas ndjekin vende si Estonia, Lituania apo Franca që janë në krye të listës së vendeve ku puna në shtet zë një pjesë të konsiderueshme të tregut të punës. Shqipëria është shumë larg këtyre vendeve, dhe në rast se do të ishte pjesë e Bashkimit Europian, do të ishte e parafundit në listë, duke lënë pas vetëm Gjermaninë, me një normë në 10%.
Pra, në krye të listës qëndrojnë vendet që kanë një nivel të lartë mirëqenie dhe ku shteti social është në themel, ndërkohë që në fund të klasifikimit qëndrojnë vende ku mbretëron sipërmarrja dhe industria. Por, vendi ynë është një përjashtim nga ky rregull i përgjithshëm, pasi paçka se ka një industri dhe ekonomi tregu jo shumë të zhvilluar klasifikohet krah vendeve si Gjermania.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.