Shteti, pa Gjykatat kryesore – Dvorani: Në maj gati kandidaturat për Kushtetuese, kemi bërë 2 mijë hetime

Mungesa e Gjykatës së Lartë dhe asaj Kushtetuese, boshatisja e sistemit për shkak të shkarkimeve të Vetting-ut, mosfunksionimi i organeve të reja të drejtësisë, zvarritja e fortë e çdo reformës në drejtësi.

Kanë qenë këto disa prej problematikave më të mprehta të adresuara gjatë analizës të organeve të reja të drejtësisë nga ana e Komitetit Shqiptar të Helsinktit, i cili mblodhi në një takim aktorët kryesorë të sistemit në vend.  Por sipas Kreut të Këshillit të Emërimeve në Drejtësi,  Ardian Dvorani, pavarësisht vonesave, vendi është pranë ngritjes së Gjykatës Kushtetuese. Ai bëri me dije se aktualisht janë marrë në shqyrtim dhjetëra kandidatura dhe se janë kryer ndaj tyre rreth 2 mijë hetime në 60 institucione publike e subjekte privatë.

Kryeprokurorja e Përkohshme Arta Marku evidentoi disa prej problemeve me të cilat është përballur sistemi i drejtësisë për shkak të reformës. Rezerva të forta lidhur me standardet dhe veçanërisht zvarritjen e reformës në drejtësi shprehu Avokatja e Popullit Erinda Ballanca.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.