Shtigjet e Alpeve Shqiptare në korridorin “Via Dinarica” – Shqipëria dhe Kosova nisin bashkëpunimin ndërkufitar

Shqipëria dhe Kosova do të bashkëpunojnë së bashku për projektin ndërkufitar që do të fokusohet në zgjatimin e shtegut të njohur si “Via Dinarica”, një ndër atraksionet turistike më të rëndësishme në Ballkanin Perëndimor.

Fondi Shqiptar i Zhvillimit dhe Fondi për Zhvillimin e Komuniteteve në Kosovë (CDF) kanë nisur punën për zbatimin e këtij projekti i cili do të financohet nga fonde IPA Programi i Bashkëpunimit Ndërkufitar Kosovë – Shqipëri.

Ky projekt, i cili ka për qëllim përfshirjen e një numri shtigjesh të Alpeve Shqiptare në itinerarin “Via Dinarica,” parashikon një sërë ndërhyrjesh në përmirësimin e infrastrukturës turistike, rigjallërimin e shtigjeve malore në të dy anët e kufirit, si dhe në rritjen e aksesit për individët që janë të apasionuar pas ecjes apo shëtitjeve me biçikletë.

“Via Dinarica” është një shteg 2 000 km i gjatë që lidh shtatë vende të Ballkanit Perëndimor, Slloveninë, Kroacinë, Bosnjë – Hercegovinën, Malin e Zi, Shqipërinë, Kosovën dhe Maqedoninë.

Në vitin 2017, revista ‘National Geographic Traveler’, e ka cilësuar atë edhe si një ndër vendet më të mira për t’u vizituar, që është tashmë pjesë e platformës globale për turizmin malor.

Përmes këtij projekti ndërkufitar, synohet jo vetëm nxitja e potencialit të rajonit në sektorin e turizmit, por edhe zhvillimi i zonave rurale përgjatë shtegut.

Ndërkohë, përfaqësuesit e FSHZH-së dhe partnerët e CDF-së kanë zhvilluar një takim në Kosovë, gjatë të cilit kanë diskutuar edhe mbi drejtimet kryesore të zbatimit të projektit, rolet, funksionet si dhe planin e aktiviteteve.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.