Shtimi i turistëve – 16% më shumë për Nëntorin, kryesojnë fqinjët
Numri i turistëve të huaj që vizituan Shqipërinë u rrit sërish gjatë muajit nëntor. Të dhënat e publikuara të enjten nga Instituti i Statistikave treguan se numri i vizitorëve të huaj është rritur 15.5% me bazë vjetore, rritje kjo në nivele të ngjashme me Tetorin.
Për të gjithë 11 mujorin e këtij viti, Shqipërinë e kanë vizituar 4.86 milionë shtetas të huaj, shifër kjo në rritje me 7.8% krahasuar me të njëjtën periudhë të një viti më parë.
Interesi për Shqipërinë nga të huajt është në rritje, çka dëshmohet si nga numri i vizitorëve, ashtu edhe nga zgjerimi i hartës së shteteve prej nga vijnë turistët e huaj.
Lista ende kryesohet nga vizitorët e vendeve fqinje, duke filluar nga Kosova, e ndjekur nga Maqedonia, Greqia dhe Mali i Zi.
Megjithatë, rritja më e lartë e numrit të udhëtarëve këtë vit po vjen nga vende të tjera, ku spikatin Polonia, Gjermania apo Zvicra.
Numri i turistëve nga Polonia është rritur me 76%, nga Gjermania me 46%, ndërsa nga Zvicra me 49%. Ndërkohë, shtetasit amerikanë që kanë vizuar Shqipërinë këtë vit janë afro 94 mijë.
E dukshme këtë vit është një rënie e fortë e numrit të vizitorëve nga Kosova, me rreth 20%. Kjo rënia ka qenë sidomos e spikatur në muajt e sezonit veror, kur fluksi i pushuesve kosovarë është zëvendësuar me turistë të ardhur prej vendeve të tjera.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.