Shtohen 10 mijë fidanë pishe në liqenin e Vaqarrit! Bashkia: Objektivi, 50 mijë. Destinacion alternativ për familjet e kryeqytetit
Bashkia e Tiranës njofton se këtë fundjavë, parkut të Liqenit të Vaqarrit i janë shtuar rreth 10 mijë fidanë pishe. Dhjetëra vullnetarë dhe punonjës të institucioneve të varësisë së Bashkisë së Tiranës iu bashkuan aksionit për mbjelljen e fidanëve të rinj.
Rreth Liqenit të Vaqarrit këtë vit parashikohet të mbillen gjithsej 50 mijë fidanë të rinj, duke synuar në këtë mënyrë krijimin e një destinacioni alternativ për familjet e kryeqytetit në fundjavë.
“Në total do të kemi 30 mijë pisha dhe 20 mijë dafina. Sot kemi vetëm lotin e parë. Jam i bindur se nëse vazhdojmë me këtë ritëm çdo vit, do kemi mundësi jo vetëm të rikuperojmë ç’kemi humbur, por do kemi mundësi t’i lëmë një pajë gjeneratës tjetër që dallon nga paja që na u trashëgua nga prindërit tanë në vitet ’90, ku çdo gjë publike konsiderohej pa zot, prerja e druve u kthye në modë dhe hedhja e plehrave dokudo ishte një lloj norme” tha kryebashkiaku i Tiranës Erion Veliaj.
Synimi i Bashkisë së Tiranës është që deri në përfundim të sezonit të mbjelljeve, kryeqytetit t’i shtohen mbi 100 mijë pemë. Pylli Orbital, i njohur ndryshe edhe si unaza e 5-të e Tiranës, do të çojë në mbjelljen e një muri të gjelbërt me 2 milion pemë duke lidhur 14671 hektarë parqe, fusha bujqësore, pyje dhe forma të tjera të vegjetacionit rreth qytetit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.