Shtohen azilantët shqiptarë/ 14% më shumë gjatë Shtatorit, numri i atyre në pritje arrin rekord!
Zyra Europiane për mbështetjen e azilantëve ka publikuar të dhënat më të fundit e që i referohen muajit Shtator. Sipas këtyre të dhënave, shqiptarët vazhdojnë të trokasin dyerve të Europës duke kërkuar strehë me justifikimin se jeta e tyre rrezikohet në Shqipëri. Madje, të dhënat flasin për një rritje të numrit të azilantëve shqiptarë në Bashkimin Europian gjatë Shtatorit të këtij vitit. Numërohen në 1734 kërkesa për azil për herë të parë gjatë kësaj periudhe kohore, si dhe 1968 në total, pasi pak më shumë se 200 kërkesa janë të përsëritura.
Shifra është në rritje si në krahasim me muajin paraardhës, kur flitej për 1519 kërkesa për herë të parë, pra në rritje me 14%, e si në krahasim me Shtatorin e vitit të kaluar, kur flitej për 1699 kërkesa, në rritje me 2%. Rritja e numrit të kërkesave ka bërë që totali i shqiptarëve në pritje të arrijë rekordin e dy viteve të fundit në 12.680, sipas të dhënave më të fundit. Gjatë Shtatorit ndërkohë, vihet re edhe një ulje e lehtë e kërkesave të cilat kanë marrë një përgjigje negative.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.