Shtohen prokurimet publike të paautorizuara. Raporti i Auditëve të Brendshëm: 22.3% e blerjeve pa marrë miratimin e thesarit
Numri i urdhër prokurimeve të paautorizuara mbetet një problem shqetësues I trashëguar vit pas viti nga institucionet e administratës publike. Scan Televizion ka zbardhur të dhënat e njësive të audititit të brendshëm në institucionet publike, sipas të cilave, për vitin 2019 22.3% e prokurimeve janë zbatuar pa marrë autorizimin përkatës.
Treguesi “Numri i urdhër-prokurimeve të paautorizuara” paraqet numrin e urdhër prokurimeve të paautorizuara kundrejt shumës totale të urdhër prokurimeve të dërguara për pagesë në thesar. Megjithëse rreth një e katërta e prokurimeve janë kryer pa marrë paraprakisht autorizimin përkatës, Ministria e Financave, e cilave ka përmbledhur në një raport të dhënat e auditëve të brendshëm, e quajnë të kënaqshëm treguesin. “Për vitin 2019, ky tregues paraqet një performancë të kënaqshme për të gjitha grupet e institucioneve, duke u vlerësuar me 2.95 pikë (ose 73.7%), pavarësisht se ka një përkeqësim të situatës në krahasim me vitin 2018”, shkruan në raportin përfundimtar Ministria e Financave.
Institucionet më problematike paraqiten ministritë e linjës, ndërkohë që institucionet e pavarura karakterizohen nga një efektivitet i këtij treguesi prej 89.4 %. Ky rezultat për institucionet e pavarura evidenton faktin se pothuajse të gjitha këto njësi janë efiçente dhe efektive në mbarëvajtjen e procesit të dërgimit të urdhër-prokurimeve të autorizuara në thesar. Të gjitha njësitë publike kanë detyrimin të paraqesin urdhër-prokurimet në Agjencinë e Prokurimeve Publike me autorizimin e Thesarit. Kryesisht, ato raste të cilat shfaqin problematika, vijnë për shkak të mungesës ose mospërputhjes së dokumentacionit mbështetës të tyre.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.