Shtrëngohen lejet e ndërtimit, zbardhet dokumenti i KKT – Ja kërkesat që duhet të përmbushin ndërtuesit në aplikim
Nga vërtetimet e detyrueshme të Institutit të Monumenteve të Kulturës te ato të Këshillit Kombëtar të Restaurimeve, nga raporti gjeologo-inxhinierik – sizmik apo hidrologjik, deri te imazhet tredimensionale të objektit.
Sekretariati i Këshillit Kombëtar të Territorit ka shtrënguar kushtet e dhënies së lejeve të reja të ndërtimit. Tashmë ndërtuesit do të jenë të detyruar të paraqesin një vërtetim të Institutit të Monumenteve të Kulturës për prezencë ose jo të monumenteve në territorin ku aplikohet.
I detyrueshëm do të jetë edhe një vendim Këshillit Kombëtar të Restaurimeve, ndërkohë që aplikimi duhet të përmbajë Vlerësimin e Ndikimit në Mjedis.
Në dokumentin e zbardhur nga Televizioni SCAN theksohet se detyrim është edhe relacioni teknik i projektit, po ashtu edhe Grafiku i punimeve dhe organizimi i procesit të punës, bashkë me raportin gjeologo-inxhinierik – sizmik dhe hidrologjik.
Në rastet kur investimi do të kalojë vlerën e 100 milionë lekëve, e detyrueshme do të jetë edhe oponenca teknike nga Instituti i Ndërtimit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.