Shtrenjtohet fatura e Brexit – Janë rritur detyrimet ndaj BE që Britania ka pranuar të paguajë
Britania mund të paguajë më shumë para drejt buxhetit europian, përpara se të dalë nga Bashkimi Europian, për shkak se detyrimet ndaj bllokut janë rritur nga kostot më të mëdha të pensioneve dhe garancive financiare. Sipas një marrëveshjeje të arritur në muajin Mars me Bashkimin Europian, Britania premtoi se do të respektojë detyrimet ndaj Europës deri në fund të vitit 2020. Qeveria britanike ka vlerësuar një faturë totale për Brexit në 39 miliardë paund (50.7 mld $).
Megjithatë, të dhënat e reja tregojnë se borxhet e Bashkimit Europian po rriten, diçka që mund të përkthehet në një kontribut më të madh nga Britania. Gjykata Europiane e Audituesve bëri të ditur në një raport se detyrimet e pensioneve në BE janë rritur në 73.1 miliardë euro në vitin 2017, nga 67.2 miliardë që vlerësohej më parë. Shtetet europiane kontribuojnë ndaj buxhetit të përbashkët në proporcion me Produktin e Brendshëm Bruto.
Gjykata deklaroi se deri më tani është e pamundur që të llogaritet fatura përfundimtare për Britaninë, për shkak se kushtet e marrëveshjes dhe të dhënat financiare mund të ndryshojnë përgjatë Brexit. Fatura mund të fryhet gjithashtu nga “detyrimet kontigjente”, që janë garancitë e Bashkimit Europian për projektet e investimeve apo ndaj kredive të Bankës Europiane të Investimeve. Këto janë rritur në 123 miliardë euro në vitin 2017, nga 115.3 miliardë që ishin një vit më parë.
Britania ka pranuar që të paguajë të gjitha detyrimet e BE që mbulojnë operacionet financiare, përpara se të dalë nga Europa. Përveç këtyre pagesave shtesë financiare dhe të pensioneve, që Britania do të duhet të zhvillojë edhe pas Brexit, shtetet europiane janë të detyruara që të paguajnë në buxhetin e BE deri në 2020-ën. Britania ka premtuar të paguajë 6.3 miliardë euro në buxhetin 2014-2020, por deri më tani ka disbursuar vetëm 1 miliardë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.