Shtrohet Rruga “Besnik Hidri” – Veliaj: Investime me të njëjtin standard si në qendër, ashtu edhe në periferi
Banorët e rrugës “Besnik Hidri” në Laprakë, tashmë kanë një rrugë të shtruar dhe me standarde. Bashkia e Tiranës ka ndërhyrë duke investuar edhe në zonat periferike, për t’u siguruar banorëve kushte më të mira jetese dhe rritje të vlerës së pronës nëpërmjet rikualifikimit urban. Kreu i bashkisë Erion Veliaj, teksa inspektoi punimet, siguroi Banorët e kësaj zone për investime me të njëjtin standard si në qendrën e kryeqytetit, përfshirë ndriçimin, infrastrukturën, fibrat optike etj.
“Bregu i Lumit prek sot Njësinë 11, Njësinë 9, Njësinë 8 dhe Njësinë 4 e nëse viti i parë ishte viti i emergjencave, viti i dytë ishte viti i zonave qendrore të Tiranës, viti i tretë ishte viti i fshatrave, që lidhen me Tiranën, viti i katërt është viti i investimeve në periferi. Siç e shikoni, kemi kaluar pjesën më të madhe të gushtit në periferi. Duam që e gjithë zona e Bregut të Lumit, në të katër njësitë, të lidhet me Tiranën dhe të kenë të njëjtin standard si në ndriçim, si në infrastrukturë, si në fibra optike, si në kanalizim, si në ujë”, rikualifikimi urban ka sjellë jo vetëm kushte më të mira jetese për banorët, por edhe ka rritur vlerën e pronës së tyre. “Më vjen mirë që nëse herën e parë diskutohej çfarë do të ndodhë me shtëpinë time, sot njerëzit flasin për vilën e tyre. Është e njëjta ndërtesë, fjala vilë nga fjala shtëpi ndryshon vetëm për faktin që janë kuruar muret, janë ulur bazamentet, njerëzit nuk rrethohen me barriera për t’u mbrojtur nga njëri-tjetri, por e trajtojnë komunitetin si një shtëpi të tyre të përbashkët”, nënvizoi Veliaj.
Kreu i bashkisë kërkoi mbështetjen dhe bashkëpunimin e banorëve që të mirëmbajnë investimet, ndërsa siguroi se deri në fund të mandatit të parë, të gjithë qytetarët e kryeqytetit do të ndjejnë investimet dhe punën e Bashkisë së Tiranës.
“Na duhet ta ruajmë këtë investim, që të kalojmë në një investim tjetër. Vitin e fundit të mandatit të parë do ta kalojmë të fokusuar tek periferitë. Në mënyrë proporcionale, në të gjithë territorin e Tiranës, të gjithë do prekin punën e bashkisë. Na mbetet t’i japim një sforco të fundit, deri në datën 17 shtator kur hapen shkollat, për të mbyllur infrastrukturën arsimore, çerdhe, kopshte, shkolla, sidomos të rejat që hapen për herë të parë, dhe sigurisht duke kërkuar mirëkuptimin e qytetarëve që teksa kthehen nga pushimet, ne i japim dorën e fundit të asfaltit dhe sinjalistikës 100 kantiereve që kemi hapur në qytet”, tha Veliaj.
Rruga “Besnik Hidri” ndodhet në Njësinë 11 dhe shtrihet në një zonë të zhvilluar pas viteve ’90. Rruga është pajisur me trotuare, ndriçim dhe sinjalistikë të nevojshme. Gjithashtu, në rindërtimin e rrugës janë kryer të gjitha punimet e nevojshme që kanë të bëjnë me rrjetin e kanalizimeve dhe ujërave të zeza.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.