Shtyhen pagesat e tatim-fitimit – Projekti në Kuvend/ Kategoritë e bizneseve që përfitojnë nga lehtësitë

Qeveria ka vendosur të lehtësojë bizneset e vogla dhe të mëdha, përmes mospagesës apo shtyrjes së kësteve të tatim-fitimit, për shkak të gjendjes së vështirë të krijuar nga COVID-19. Akti normativ i qeverisë është depozituar për diskutim në komisionet parlamentare dhe së shpejti i hapet rrugë miratimit të tij.

Sipas relacionit, për tatimpaguesit me qarkullim mbi 14 milionë lekë (përveç tatimpaguesve që ushtrojnë aktivitet në fushën e telekomunikacionit, produkteve ushqimore të konsumit, të farmaceutikës (farmacitë) dhe sistemit bankar)) propozohet shtyrje e kësteve të parapagimit të tatimit mbi fitimin të tremujorit të dytë dhe të tretë të vitit 2020. Pagesat e këtyre kësteve shtyhen në periudhën prill-shtator 2021.  Për tatimpaguesit që ushtrojnë aktivitet në fushën e turizmit, të përpunimit aktiv dhe të call center, propozohet shtyrje e kësteve të parapagimit të tatimit mbi fitimin të periudhës tatimore prill-dhjetor 2020.

Pagesat e këtyre kësteve shtyhen në periudhën prill-dhjetor 2021, Ndërsa për bizneset e vogla, pra për tatimpaguesit me qarkullim nën 14 milionë lekë këstet e tatim-fitimit të vitit 2020 do të bëhen zero.  Akti normative, shtyn gjithashtu  edhe afatin për dorëzimin e deklaratës individuale të tatimpaguesve dhe pagesën e detyrimeve që lindin në këtë rast deri në 31 Korrik 2020.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.