Shtyhet afati – Gjiknuri: Konsumatorët familjarë edhe 1 muaj kohë për kontratat e ujit

Konsumatorët familjarë do të kenë edhe një muaj kohë për të formalizuar lidhjet e ujit të pijshëm. Kështu është shprehur ministri i Infrastrukturës dhe Energjisë, Damian Gjiknuri në një deklaratë për mediat. Sipas tij, kjo bëhet për shkak të fluksit të madh në sportele dhe sepse bizneset janë më të pakta në numër.

Ndërkohë, u bëri thirrje subjekteve private që të vetëdeklarohen, në mënyrë që të shmangin penalizimet. 1 shkurti është parashikuar edhe afati i fundit për të rregulluar lidhjet dhe për të bërë kontratat me ujësjellësin.

Gjiknuri tha se pas kësaj date nis verifikim dhe masat do të shtrihen në çdo biznes që nuk i përgjigjet kësaj thirrje, duke paralajmëruar masa penale për vjedhje dhe ndërprerje të furnizimit me energji në rast se evidentohen debitorë.

Po ashtu, shtoi më tej se në ditët në vijim do të nënshkruhen edhe kontratat e performancës ndërmjet Ujësjellësit të Kanalizimeve dhe Bashkive.

“Në ditët e ardhshme do të nënshkruhen edhe kontratat e performancës mes Ujësjellës Kanalizimeve dhe Bashkive, që do të jenë edhe testi që do të kenë ato për të përfituar investime në sistemin e ujësjellësit.”

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.