Më shumë biznese sekondare – Mbi 9 mijë sipërmarrës kanë një subjekt të dytë

Kryeqyteti është më i lakmuari ndër qytetet e tjera për të zhvilluar biznes, kjo për shkak të numrit të lartë të popullsisë i cili ka ardhur në rritje të përvitshme, të përqendrimit të shërbimeve dhe institucioneve shtetërore.

Në 24 njësitë administrative të Tiranës zhvillojnë aktivitetin 45.912 subjekte kryesore, ku ish 11 njësitë e vjetra, kanë edhe përqendrimin më të lartë. Por ajo që vihet re është shifra e lartë edhe e bizneseve sekondare, pra që janë në pronësi të individëve që e kanë një biznes kryesor.

Sipas të dhënave nga Drejtoria e Përgjithshme e Taksave dhe Tarifave Vendore për vitin 2017,  në të 24 njësitë administrative të Tiranës zhvillojnë aktivitetin ekonomik 9270 subjekte sekondare,  kjo shifër tregon mesatarisht edhe numrin e  sipërmarrësve që kanë një biznes të dytë.

Ajo që vihet re është rritja e bizneseve sekondare krahasuar me vitin 2016, ku numri i tyre ka qenë 8809, pra rreth 461 subjekte dytësore më shumë.

Kategoria e parë në renditje janë dyqanet e shitjes me pakicë, me 3661 subjekte, të ndjekur nga njësitë e shërbimit, si hotelet, baret, restorantet, “shitje me shumicë”, subjekte në sektorin e transportit, etj.

Ashtu sikurse për bizneset kryesore, edhe për ato sekondare, zonat në zhvillim të Tiranës janë më tërheqëse. Vetëm në Kashar janë pozicionuar 722 subjekte dytësore, e ndjekur nga Farka me 255 subjekte, Dajti 112, Vaqarri 111 subjekte.

Numrin më të ulët në këtë drejtim e regjistron Zall Bastari me vetëm një subjekt dhe Kërraba me tre subjekte dytësore.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.