Më shumë kulturë për shqiptarët vitin e kaluar – 173 mijë spektatorë nëpër shfaqje. Frekuentimi i bibliotekave ra me 41.3%
Shqiptarët dhe turistët që vizituan vendin tonë gjatë vitit të kaluar patën më pak mundësi për të shijuar shfaqje dhe ekspozita në institucionet kulturore të vendit. Të dhënat e fundit të INSTAT mbi kulturën tregojnë se, me përjashtim të Teatrit Kombëtar Popullor, të gjithë institucionet në vend ulën numrin e aktiviteteve të tyre.
Pavarësisht reduktimit të aktiviteteve, vizitorët ishin më të pranishëm në sallat kulturore. Në fakt, rritja nga viti në vit është me gati 60 mijë spektatorë.
Teatri Kombëtar i Operas, Baletit dhe Ansamblit Popullor vuri vjet në skenë vetëm 99 shfaqje, rreth ¼ më pak se gjatë 2016-ës. Por gjithashtu gëzoi një rritje me 177,3% të audiencës, e cila arriti në 49 mijë të pranishëm.
Po ashtu edhe në Teatrin Kombëtar eksperimental pati një rënie të lehtë aktivitetesh, me vetëm 320 shfaqje, nga 338 në 2016-ën. Megjithatë, edhe në këtë rast, kjo u shoqërua me një rritje me 10,6% të spektatorëve.
Siç e thamë edhe më sipër, Teatri Kombëtar është i vetmi institucion kulturor që rriti numrin e shfaqjeve, me rreth 21,2%, çka u përkthye në mbi 10 mijë spektatorë më shumë.
Zhvillimi i mëtejshëm i turizmit dha një ndikim të madh në vizitat nëpër muzetë, parqet arkeologjike dhe kalatë në vend. Pothuajse 670 mijë vizitorë bënë një ndalesë në këto pika të rëndësishme të vendit, rreth 120 mijë individë më tepër nga një vit më parë.
Interesi këtë vit u shtua sidomos për muzetë, çka pritet të vijojë edhe gjatë vitit mbarëkombëtar të Skënderbeut, veçanërisht në Muzeun Historik në Kalanë e Krujës, si dhe në Muzeun Kombëtar në Tiranë. Po ashtu, aktivitetet që do të zhvillohen në kuadër të këtij jubileu pritet të rritin edhe pjesëmarrjen në shfaqjet e institucioneve kulturore.
Fatkeqësisht, prezenca e shtuar në jetën kulturore të vendit nuk është përkthyer në më shumë vizita në bibliotekë. Frekuentimi në Bibliotekën Kombëtare ra nga 150 mijë individë në vetëm 88 mijë, ndërsa shërbimi i njësive bibliotekare u përgjysmua në vetëm 72 mijë njësi.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.