Si do të bëhet akomodimi i studentëve, tarifat dhe kushtet-Flet për “SCAN Magazine“ Ornela Dume, drejtoreshë e shërbimeve
Procesi i strehimit në Shqipëri ka qenë gjithmonë një problem, po ashtu edhe strehimi i të rinjve të cilët zhvendosen nga rrethet për t’u arsimuar në kryeqytet, të cilëve u është dashur që përveç se të largohen nga familjet e tyre, të përballen edhe me shumë sfida për t’u akomoduar. Dikush zgjedh një banesë me qira, dikush tjetër të vendoset pranë godinave të qytetit “Studenti“. Po sa të përshtatshme janë këto godina për të mirëpritur studentët?
Në fakt ndër vite situata ka qenë problematike sa i takon kushteve që ofronin këto konvikte duke filluar nga tualetet e përbashkët, dushet, ngrohja, etj. Megjithatë, në një vëzhgim të bërë nga “SCAN“ rezulton se ka një përpjekje për ta bërë më komod qëndrimin e të rinjve që përzgjedhin konviktet gjatë periudhës së studimeve. Sipas përfaqësuesve të administratës për Rezidencën Studentore Universitare, situata ka ndryshuar dhe tashmë studentët gjejnë jo vetëm akomodim në ambiente të rikonstruktuara, por edhe shërbime të ndryshmë si Ëi Fi, më shumë hapësira të vëna në dispozicion për të studiuar dhe padyshim aktivitetet kulturore ku mund të argëtohen. Për investime në këtë sektor janë dhuruar edhe grante. Granti i fundit ishte ai i qeverisë gjermane prej 15 milionë eurosh për të përmirësuar kushtet e jetesës, kryesisht për izolimin termik të godinave të kampusit universitar.
Pas identifikimit të masave të rikonstruksionit këtë vit, faza e ndërtimit nis vitin që vjen dhe zgjat 18 deri në 24 muaj. Nga ky grant pritet të rinovohet sistemi ngrohës, krahas kësaj, do të rinovohen pajisjet sanitare dhe do të ndërtohen dhomat e studimit dhe kuzhina. Megjithatë sipas drejtuesve të RSU-së ende priten grante për investime të mëtejshme të infrastrukturës. Prej vitesh tarifat vijojnë të jenë të njëjta për studentët. Një student paguan 45 mijë lekë për 9 muajt e shkollës. Në këtë çmim përfshihen administratori i rezidencës, recepsioni (24 orë), sanitaret, energjia elektrike dhe uji i pijshëm. Nëse studenti duhet të qëndrojë edhe gjatë tre muajve të verës atëherë do të paguajë shtesë sipas tarifës së vendosur, e cila nuk ndryshon. Gjatë kësaj vere, numri i studentëve, të cilët kanë qëndruar për arsye të punësimit në kryeqytet, arriti në 700.
Ndërkohë, në total numri i studentëve që qëndruan gjatë vitit akademik 2016-2017 arriti në 4400 gjithsej. Rezidencat 1 dhe 13 janë me pagesë mujore 10 mijë lekë në muaj, për arsye se ofrojnë kushte më të mira për studentët. Drejtoresha e shërbimeve për studentët Ornela Dume siguron se pavarësisht investimeve që priten të bëhen në gjithë godinat në të ardhmen, tarifat nuk do të ndryshojnë. Studenti i akomoduar në RSU e fiton cilësinë si i tillë me regjistrimin në Drejtorinë e Shërbimeve Studentore.
Studentët kanë të drejtë të pajisen me kartën e studentit, të shprehin opinionin e tyre për cilësinë e shërbimit dhe punën e personelit të RSU-së, të përdorin bibliotekat e mjediset sportive, kulturore e informative të RSU-së, të zgjedhin e të zgjidhen në këshillat e studentëve si edhe të zgjedhin përfaqësinë studentore nga të cilat përftohet Këshilli i Përfaqësisë Studentore të Rezidencës.
Znj. Dume sa është kapaciteti pritës në qytetin “Studenti“?
Kapaciteti pritës është 5500 studentë, të regjistruar për vitin 2016-2017 janë 5000 studentë. Nëse shohim statistikat e dhjetë viteve të fundit, numri i studenteve femra është më i madh se sa numri i studentëve meshkuj.Tarifa e akomodimit është 45.000 lekë për të gjithë vitin akademik.Të gjithë studentëve që zgjedhin RSU si vend akomodimin e tyre, nuk u ofrohet thjesht një vend për të fjetur. Përveç shërbimit bazë që është akomodimi, gjithashtu iu ofrohet mbështetja psiko-sociale, shërbimi mjekësor, aktivitete te ndryshme, interneti, salla studimi dhe biblioteka.
Studentët që rizgjedhin akomodimin në RSU, i referohen sigurisë që ofrohet, stafit të përkushtuar i cili i shërben studentëve çdo ditë, jetës aktive studentore e cila është pasuruar më shumë. Stafi i shërbimit psiko-social mbështet studentët për çdo problem apo vështirësi që mund të kenë me përshtatjen dhe me jetën sociale. Çdo godinë ka përfaqësinë studentore e cila mblidhet me stafin e RSU-së periodikisht për të diskutuar rreth problemeve, vështirësive, mundësive edhe për punësim, apo mbështetje për çdo student që përballet me vështirësi të ndryshme, duke i mbështetur dhe duke iu dhënë zgjidhje sipas rastit konkret.
Së shpejti këtu do të strehohen me dhjetëra studentë që vijnë nga rrethet, a janë përmirësuar kushtet në godina?
Aktualisht janë vetëm dy godina të rikonstruktuara, të cilat kanë kushte optimale për akomodimin e studentëve. Gjatë periudhës së verës, kur studentët largohen, kryhen shërbimet mbështetëse të ndryshme teknike, si riparime hidraulike dhe elektrike, meremetimet në tualete dhe në dushe, njëkohësisht me rregullimin e ambienteve të brendshme përmirësohet edhe infrastruktura e jashtme.
Ndërkohë, ka përfunduar projekti i master-planit të qytetit “Studenti“, nga qeveria shqiptare i cili i sjell RSU-së një rikonceptim dinjitoz se si duhet të jetë vendi, i cili pret numrin më të madh të studentëve nga e gjithë Shqipëria e jo vetëm. Vitet e fundit kemi një rritje të numrit të studentëve edhe nga vendet e rajonit, të cilët zgjedhin RSU për shkak të sigurisë dhe qetësisë si alternativën e tyre të akomodimit. Qeveria gjermane nëpërmjet një granti do të mundësojë rikonstruksionin e pesë godinave të para duke përmirësuar të gjithë infrastrukturën dhe kushtet sipas standardeve europiane, ku studentët do të rizgjedhin si alternativë akomodimi RSU-në.
Cilat janë disa nga arritjet mund të themi, që mund të veçoni gjatë punës së këtyre 4 viteve ?
Disa nga arritjet të cilat mund të veçohen gjatë punës së tre viteve të fundit janë: Kthimi i ambienteve në funksion të studentëve, kthimi i hapësirave të gjelbra dhe shtimi i tyre, shërbimi Ëi-Fi falas, më shumë salla studimi për studentët. Po ashtu, ndryshe nga vitet e mëparshme tashmë studentët janë më të përfshirë në aktivitetet social- kulturore.
Një tjetër arritje mund të themi që është master-plani, projekti për rikonstruksionin e 5 godinave të para nëpërmjet grantit nga qeveria gjermane, sistemi i sigurisë me kamera në çdo godinë si edhe regjistrimi online, i cili mundeson regjistrimin e një dhome, pa qenë nevoja e ardhjes nga rrethet në Tiranë.
A keni projekte të tjera për qytetin “Studenti“?
Së shpejti do të fillojë zbatimi i projektit të riorganizimit të bibliotekës, e cila do të funksionojë me fonde të hapura. Ky projekt do të zbatohet sipas një metodologjie që bazohet në digjitalizimin e bibliotekës, në krijimin e takimeve të hapura, aktiviteteve social-kulturore me qëllim edukimin e shijeve të studentëve.
Digjitalizimi i bibliotekës konsiston në realizmin e skanimit të fondit të librave të bibliotekës së Qendrës Multifunksionale si dhe shtimin e pasurimin me libra të rinj, të cilët do t’u ofrohen studentëve online ose të printuar sipas dëshirës. Sfidë dhe synimi kryesor mbetet realizimi i projektit të rikonstruksionit të RSU për ta kthyer më bashkëkohore, në një kampus studentor të denjë për brezat e rinj.
*Historiku i qytetit “Studenti“
Qyteti “Studenti“ që më parë emërohej Ndërrmarrja e Trajtimit të Studentëve Nr.1, tani mban emrin Rezidenca Studentore Universitare Nr.1, të ngjall dëshirën të kthehesh në retrospektivë. Me hapjen e Universitetit Shtetëror të Tiranës, i cili u inagurua me 16 shtator të 1957-ës, u krijuan premisat e një qyteti studentor në Tiranë. Deri në vitin 1958 në krijimin e qytetit “Studenti” studentët kishin konviktet e tyre pranë instituteve të tyre, siç thuhej në atë kohë, ose pranë fakulteteve ku ata studionin. Po t’u referohesh botimeve të kohës si dhe kujtimeve të ish-drejtuesve të institucionit, dalin në pah fakte që tregojnë se qyteti “Studenti“ u krijua pas ndërtimit në Sauk të Sanatoriumit që bëri të mundur zhvendosjen e të vjetrit dhe lënien e hapësirave për këtë qytet të ri. Në atë kohë rreth viteve 1967-70 në qytetin “Studenti“ kishte pak godina, një mensë, një qendër shëndetësore, që siguronin shërbimet parësore dhe më të domosdoshme për studentët.
Në këtë periudhë filluan përpjekjet e para për ndërtimin e një biblioteke për studentët që banonin aty. Gjithashtu filluan të bëhen investime të konsiderueshme duke ndërtuar dhe godina të reja, u pastrua dhe u gjelbërua terreni rreth godinave, elektrifikimi i godinave, duke i dhënë një pamje tërheqëse qytetit të ri. Po në këtë vit institutet kthehen në fakultete. Ishin rreth gjashtë fakultete me 3613 studentë, ku 3000 ishin studentët konviktorë. Administrata në qytetin “Studenti“ në ato vite përbëhej nga një drejtor, një nëndrejtor i cili drejtonte sektorin e mirëmbajtjes, mensën dhe lavanderinë.
Përafërsisht, numri i punonjësve ishte 200 dhe puna e tyre përqendrohej në krijimin e kushteve të mira në ngrënie, fjetje dhe edukimin e tyre. Në vitin 1978 bëhet inagurimi i kino-klubit “Studenti“ që do të bëhej qendra e aktiviteteve të këtij institucioni. Aty kishte sallë kinemaje, konferencash, sallë lojërash etj. Me rritjen e numrit të studentëve, rreth 6000 në vitet 80-90, lindi nevoja e shtimit të godinave që u ndërtuan nga puna vullnetare e rretheve.
Nertila Doko/SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.