Si do të jetë mot këtë fundjavë?! – SHMU: Kushte atmosferike të paqëndrueshme në të gjithë vendin
Shërbimi Meteorologjik Ushtarak njofton se këtë fundjavë vendi ynë do të vijojë të jetë nën ndikimin e kushteve atmosferike të paqëndrueshme ndaj për ditën e Shtunë moti do të jetë me vranësira mesatare dhe të dendura por nuk do të mungojnë hera-herës intervalet e shkurtra me diell.
Sipas njoftimit vranësirat do të shoqërohen me reshje shiu të herëpashershme përgjatë gjithë ditës me intensitet të ulët e lokalisht mesatar në formën e shtrëngatave.
SHMU informon se nën relativisht të njëjtat kushte atmosferike do të jetë edhe dita e Diel. Deri në orët e pasdites moti parashikohet kryesisht i vranët shoqëruar me reshje shiu të herëpashershme me intensitet të ulët e mesatar në formë shtrëngatash.
Sipas informacionit duke nisur nga orët e mbrëmjes, përgjatë vijës bregdetare dhe kryesisht zonën e jugut reshjet fitojnë intensitet deri të lartë në formën e rrebesheve shoqëruar me shkarkesa elektrike ndërsa në pjesën tjetër të vendit reshjet e shiut me intensitet mesatar.
“Përgjatë vijës bregdetare dhe zonat luginore parashikohet edhe erë intensive me drejtim verilindje – juglindje dhe shpejtësi deri në 15-18m/s, erë e cila mund të jetë problematike në disa zona.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.