Si do të përjashtohen ndërtuesit dhe furnitorët nga Tatimi mbi Vlerën e Shtuar? Zbardhet vendimi: Duhet autorizim i posaçëm
Në Fletoren Zyrtare është publikuar dhe ka marrë fuqi ligjore vendimi se si do të përjashtohen nga Tatimi mbi Vlerën e Shtuar materialet e ndërtimit që do të përdoren në kuadër të procesin të rindërtimit të vendit nga tërmeti i 26 nëntorit të vitit të kaluar .
Referuar vendimit, nga kjo lehtësi fiskale do të përfitojnë vetëm subjektet e autorizuara për procesin e rindërtimit.
Vendimi parashikon se përjashtohet nga tatimi mbi vlerën e shtuar (TVSH), brenda programit dhe përgjatë periudhës së rindërtimit për rastet e shpalljes së “gjendjes së fatkeqësisë natyrore”, sipas përcaktimeve në legjislacionin e rindërtimit:
a) furnizimi i procesit të ndërtimit, që realizohet nga ndërtuesit, subjekte të rindërtimit;
b) furnizimi i shërbimeve dhe mallrave për procesin e ndërtimit, i kryer direkt për ndërtuesit, subjekte të rindërtimit;
c) importimi i mallrave për procesin e ndërtimit, i kryer direkt nga ndërtuesit, subjekte të rindërtimit.
Ndërkohë në nenin 2 detajohet procesi i rindërtimit dhe programet e tij, për të cilat zbatohen përjashtimet nga TVSH-ja
Bazuar në dispozitat e ligjit nr. 97/2019, “Për përballimin e pasojave të fatkeqësisë natyrore”, programet e rindërtimit, për të cilat do të aplikohet përjashtimi nga TVSH-ja janë:
a) Programi i ndërtimit të objekteve në zonat e reja apo në të njëjtin truall, që përfshin:
ndërtimin e objekteve të reja dhe të infrastrukturës publike nga autoritetet shtetërore;
ndërtimin e objekteve të reja dhe të infrastrukturës publike nga donatorët;
iii. rindërtimin e ndërtesave të shembura nga fatkeqësia natyrore në të njëjtin truall.
b) Programi i ndërtimit të infrastrukturës publike, kur nuk është pjesë e programeve të tjera të parashikuara në ligj, dhe të infrastrukturës kritike, me anë të të cilit, me financim nga fondi i rindërtimit apo nga donatorët, ndërtohen ose rikonstruktohen objekte të infrastrukturës publike dhe kritike nga njësitë zbatuese.
Ndërkohë, vendimi përcakton në nenin 3 të tij se cilat janë subjektet e rindërtimit të autorizuara për përjashtimin nga TVSH-ja.
Përjashtohen nga TVSH-ja:
a) ndërtuesit/kontraktorët, subjekte të rindërtimit, të cilët u nënshtrohen dispozitave të ligjit për përballimin e pasojave të fatkeqësisë natyrore, të ligjit për tatimin mbi vlerën e shtuar në Republikën e Shqipërisë dhe përcaktimeve të këtij vendimi;
b) ndërtuesit/kontraktorët, subjekte të rindërtimit, të cilët duhet të kenë lidhur një marrëveshje kuadër me njësinë zbatuese, të ngarkuar nga Këshilli i Ministrave për administrimin e fondeve të shpërndara nga fondi i rindërtimit dhe që përdoren bazuar në procedurat e ligjit për përballimin e pasojave të fatkeqësisë natyrore, në lidhje me prokurimin publik për rindërtimin;
c) ndërtuesit/kontraktorët, subjekte të rindërtimit, të përcaktuar nga donatorët, për rastet kur donacionet/grandet e tyre nuk janë pjesë e fondit të rindërtimit sipas ligjit të buxhetit.
Në nenin 4 të vendimit përcaktohet procedura për lëshimin e autorizimit për ndërtuesit, subjekte të rindërtimit, dhe mënyra e zbatimit të përjashtimit
Për qëllime të zbatimit të përjashtimeve të mësipërme, ndërtuesit, subjekte të rindërtimit, duhet të jenë të autorizuar nga drejtori i Përgjithshëm i Tatimeve. Ndërtuesit, subjekte të rindërtimit, për t’u pajisur me autorizimin e përjashtimit nga TVSH-ja, paraqesin në Drejtorinë e Përgjithshme të Tatimeve dokumentacionin e mëposhtëm:
a) kërkesën me shkrim, së cilës i bashkëngjitet një fotokopje e certifikatës së NIPT/NUIS-it;
b) marrëveshjen kuadër, që kanë lidhur me njësinë zbatuese për secilën procedurë prokurimi publik të programit të rindërtimit, sipas parashikimeve në ligjin e fushës;
c) marrëveshjen e bashkëpunimit, ndërmjet Këshillit të Ministrave dhe donatorit, në rastet kur ndërtuesi, subjekt i rindërtimit, është përcaktuar nga donatori që ka marrë përsipër procesin e ndërtimit, në përputhje me programin e rindërtimit;
ç) preventivin e punimeve, mbi bazën e të cilit janë përzgjedhur fitues për kontratat publike për punime/shërbime ndërtimi në kuadër të zbatimit të procesit të rindërtimit, shoqëruar kjo me listën e detajuar të materialeve që do të përdoren në procesin e ndërtimit;
d) kopjen e lejes së ndërtimit, të miratuar nga organet kompetente.
Vendimi përcakton se Drejtoria e Përgjithshme e Tatimeve, brenda pesë ditëve pune, nga data e dorëzimit të dokumentacionit, shqyrton kërkesën e paraqitur nga ndërtuesi, subjekt i rindërtimit. Nëse konstatohen mangësi në dokumentacion, njoftohet kërkuesi për mangësitë e konstatuara dhe për plotësimin e dokumentacionit brenda një afati pesë ditor.
Bazuar në rezultatet e shqyrtimit, kur përmbushen kërkesat e përcaktuara dhe është plotësuar dokumentacioni i sipërpërmendur, drejtori i Përgjithshëm i Tatimeve, brenda pesë ditëve pune nga paraqitja e kërkesës, lëshon autorizimin e përjashtimit nga TVSH-ja për ndërtuesin, subjekt të rindërtimit.
Një kopje e autorizimit, së bashku me preventivin e punimeve, sipas zërave dhe sasive që do të përdoren në procesin e ndërtimit, i përcillet drejtorisë rajonale tatimore përkatëse, që ka në administrim tatimpaguesin, ndërtues, subjekt të rindërtimit.
Drejtoria e Përgjithshme e Tatimeve publikon në faqen zyrtare dhe mban të përditësuar listën e ndërtuesve, subjekte të rindërtimit, të cilët janë pajisur me autorizim përjashtimi nga TVSH-ja, ku pasqyrohen të dhënat identifikuese të tatimpaguesit, NIPT/NUIS-i, numri dhe data e lëshimit të autorizimit.
Furnizuesit e mallrave/shërbimeve të përjashtuara nga TVSH-ja për procesin e ndërtimit, të cilët furnizojnë direkt ndërtuesit, subjekte të rindërtimit, në momentin e lëshimit të faturës tatimore duhet të shënojnë në faturë dispozitën ligjore, sipas së cilës furnizimi është i përjashtuar, si dhe numrin e datën e autorizimit të përjashtimit të ndërtuesit, subjekt të rindërtimit. Gjithashtu, furnizuesi i bashkëlidh kopjes së faturës tatimore, që mban vetë, edhe një kopje të autorizimit të përjashtimit.
Asnjë përjashtim nuk akordohet për furnizuesit e mallrave ose të shërbimeve që nuk furnizojnë direkt ndërtuesit e autorizuar nga drejtori I Përgjithshëm i Tatimeve.
Ndërtuesit, subjekte të rindërtimit, të cilët i importojnë vetë mallrat që do të përdoren prej tyre për procesin e ndërtimit, pas marrjes së autorizimit të përjashtimit nga Drejtoria e Përgjithshme e Tatimeve, paraqiten pranë autoritetit doganor për të përfituar përjashtimin në import për këto mallra.
Drejtori i Përgjithshëm i Tatimeve miraton procedurë/manual të posaçëm, me qëllim kontrollin e zbatimit të përjashtimeve, në përputhje me legjislacionin për tatimin mbi vlerën e shtuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.