Si do të punësohen ushtarakët në radhët e Policisë së Shtetit? Procedurat, zbardhet relacioni i nismës ligjore
Në Kuvend janë propozuar amendimet në ligjin e Policisë së Shtetit, që ndër të tjera, parashikojnë edhe mundësinë e pranimit në radhët e saj edhe të ushtarakëve. Referuar relacionit të projektligjit, në funksion të luftës kundër krimit të organizuar dhe terrorizmit, si prioritete kyçe të Policisë së Shtetit, është vlerësuar i nevojshëm pranimi edhe nga Forcat e Armatosura.
Në këtë rast, është parashikuar edhe ekuivalentimi i gradave të Forcave të Armatosura të Republikës së Shqipërisë me gradat e Policisë së Shtetit, me vendim të Këshillit të Ministrave.
Një prej amendamenteve parashikon shtimin e një pike në nenin 40 të ligjit ekzistues me emërtesën “Pranimi nga radhët e Forcave të Armatosura”.
“Kjo dispozitë parashikon që për plotësimin e nevojave të veçanta mund të pranohen në Policinë e Shtetit ushtarakë të Forcave të Armatosura të Republikës së Shqipërisë. Gjithsesi, pranimi bëhet vetëm në rast se respektohen kriteret e përgjithshme të pranimit. Pranimi realizohet mbi bazë marrëveshjeje dypalëshe, ndërmjet ministrit të Mbrojtjes dhe ministrit përgjegjës për çështjet e rendit dhe të sigurisë publike, ku përcaktohen kuotat dhe strukturat nga ku do të pranohen” shkruhet në relacion.
Pranimi parashikohet të bëhet vetëm pas nxjerrjes në lirim të ushtarakëve nga autoritetet kompetente të përcaktuara nga legjislacioni në fuqi dhe realizohet mbi baza konkurrimi, procedurat e të cilit përcaktohen me udhëzim të ministrit përgjegjës për çështjet e rendit dhe të sigurisë publike.
Në këtë rast, sipas projektligjit, njihet vjetërsia e shërbimit dhe bëhet ekuivalentimi i gradave të Forcave të Armatosura të Republikës së Shqipërisë me gradat e Policisë së Shtetit, me vendim të Këshillit të Ministrave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.