Si do të rimëkëmben bashkitë? – Qeveria vendos t’u japë më shumë para
Qeveria ka një plan të qartë për rimëkëmbjen e bashkive deri në vitin 2022 në mënyrë që të kenë të ardhura të mjaftueshme për të shërbyer qytetarët dhe autonomi vendore. Kështu, ekzekutivi ka planifikuar që të rrisë shpërndarjen e taksës së mjeteve të përdorura në buxhetin e njësive të vetëqeverisjes vendore në masën 30% si dhe të rrisë shpërndarjen e taksës së rentës minerare në buxhetin e njësive të vetëqeverisjes vendore në masën 10% . Po ashtu ka planifikuar ngritjen e një sistemi raportimi dhe rakordimi nga administrata qendrore për masën e rentës minerare të pagueshme për njësitë e vetëqeverisjes vendore.
Një tjetër pikë është ndarja e të ardhurave nga tarifat koncesionare të veprave energjetike dhe shfrytëzimit të burimeve natyrore në nivelin 15% për buxhetet e njësive të vetëqeverisjes vendore. Të gjitha këto burime financiare në rritje për bashkitë, kanë afat realizimi deri në vitin 2020. Qeveria parashikon gjithashtu rritje graduale të financimit për transfertën e pakushtëzuar deri në 1,5% të PBB-së dhe rishikimi i sistemit të granteve të kushtëzuara për të siguruar financimin e projekteve strategjike vendore. Aktualisht me fondet që kanë në dispozicion bashkitë kanë shumë pak mundësi për investime, për shkak se pjesa më e madhe e buxhetit shkon për shpenzime pagash dhe sigurimesh shoqërore. Plani për veprim është hedhur për konsultim dhe pritet të miratohet së shpejti .
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.