Si e harxhojmë energjinë – E kundërta Europës, durojmë të ftohtin, por jo vapën
Gjysma e konsumit energjetik të shqiptarëve shkon për gatim dhe ngrohje të ujit. Në krahasim me vendet e tjera të Europës, vetëm Portugalia ka një normë lehtë më të lartë.
Të dhënat më të fundit të Eurostat tregojnë se, përafërsisht, një e pesta e konsumit të familjeve në Shqipëri shkon për të ngrohur ujin. Në Europë, vetëm Malta regjistron një normë më të lartë.
Nga ana tjetër, të dhënat tregojnë se, thuajse një e treta e konsumit shkon për gatim. Në Europë vetëm Portugalia ka një normë më të lartë se vendi sa i përket mënyrës se si ndahet torta e harxhimit të energjisë për përdorim familjar.
Po në vend të dytë, Shqipëria renditet edhe sa i përket normës së harxhimit për ftohjen e ambienteve të brendshme, me 5.4% të totalit.
Çuditërisht, Shqipëria renditet ndër vendet që kanalizon më pak energji në drejtim të ngrohjes së ambienteve të brendshme, ekzaktësisht 32.2% të totalit, pra thuajse sa ç`harxhon për gatimin.
Kjo do të thotë se, në krahasim me europianët, shqiptarët janë dorështrënguar kur bëhet fjalë për tu ngrohur, por jo kur bëhet fjalë për t`i bërë ballë vapës. Në këtë drejtim, vendi ynë është i treti nga fundi. Pjesa e mbetur ndërkohë, rreth 11% e konsumit shkon për ndriçim, normë kjo pranë mesatares europaine.
Të dhënat e Eurostat tregojnë se, shqiptarët harxhojnë për gatim aq sa harxhojnë për ngrohje, ndërkohë që europianët harxhojnë për ngrohje ekzaktësisht 11.7 herë më shumë se sa harxhojnë për gatim.
Bashkimi Europian harxhon 64.6% të energjisë për ngrohje, 0.3% për ftohje, 14.5% për ngrohjen e ujit, 5.5% për gatim 13.8% për ndriçim dhe 1.3% për qëllime të tjera. Me konsum energjetik të dhënat nuk i referohen vetëm atij elektrik, por edhe energjisë me gaz, naftë, dhe burime të tjera, si ato të rinovueshme.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.