Si ishin Vlora dhe Saranda në vitet 1915-1918? 80 foto nga ndërtimi i rrugëve, spitaleve, bregdetit, centrali elektrik e deri te traktori i parë

Gjatë Luftës së parë Botërore, forcat italiane do të përqëndroheshin në Vlorë në kuadrin e asaj që është emërtuar si “Fushata e Shqipërisë”. I dërguari i revistës franceze Robert Vaucher, më 6 janar 1917 do ta shkruante se puna e forcave ushtarake italiane do të përqendrohej në dy drejtime; civile dhe ushtarake.

“Gjatë një viti, me një punë të palodhshme, fizionomia e qytetit të Vlorës është transformuar, duke fituar disa shekuj të humbur nën përgjumjen osmane” shkruan Vaucher. Ai evidenton gjithashtu se po ndërtoheshin kanale kullimi, godina gjykate, bashkia, pazari i mbuluar, spitalet etj. “Ndërtimi i tyre do t’u lejojë banorëve të Vlorës të mirat e një qytetërimi modern” vijon raportimi ku evidentohen edhe kilometrat e rrugëve të rregulluara apo numrin e urave të sistemuara.

Por si ishin realisht Vlora dhe Saranda në periudhën 1915-1918? Gjithçka është dokumentuar me fotografi një album që mban titullin “Albania e Macedonia” dhe që ka si autorësi repartin fotokinematografik të ushtrisë italiane. Në fotot e mëposhtme jepen detaje nga jeta e atyre viteve, veprat që po ndërtoheshin apo veprat ekzistuese. Interesant është fakti se në Shqipërinë e atyre viteve, në rajonin Vlorë-Sarandë do të kishte central për prodhim energjie, stacion meteorologjik, avionë e hidrovolantë, pistë aviacioni apo edhe traktorë për punimin e tokës.

Kreshnik KUÇAJ/SCAN