Si lindi ‘Dita e Verës”?! Disa mënyra si mund ta festojmë duke qenë të izoluar në shtëpi
Dita e Verës, mund të konsiderohet si festivali më i madh pagan në të gjithë vendin. Arsyeja e festimit të Ditës së Verës është se përfaqëson fundin e stinës së dimrit, përtëritje të shpirtit të shqiptarëve dhe rilindjen e natyrës. Ndërsa shumica e festave zhvillohen në qytetin e Elbasanit, i cili njihet ndryshe dhe si ‘’Qyteti i Luleve’’, festa zhvillohet edhe në Tiranë, si dhe në disa koloni Arberesh në Itali. Dita e Verës u bë një festë zyrtare në Shqipëri në 2004.
Por si lindën festimet e Ditës së Verës?
Festivali i Ditës së Verës feston fillimin e motit më të ngrohtë. Rrënja e këtij festivali është gjurmuar në tempullin e Zaa Malit e ndërtuar afër Shkumbinit. Perëndeshë e natyrës, pyjeve dhe gjuetisë, Muse, doli vetëm nga tempulli i saj në 14 Mars, gjë që tregoi edhe fillimin e sezonit të verës. Kjo është një legjendë që ka kaluar brez pas brezi në Shqipëri. Në të kaluarën, i vetmi qytet që e festonte Ditën e Verës ishte Elbasani; megjithatë, sot, njerëz në të gjithë Shqipërinë e festojnë këtë ditë me familjarët dhe miqtë e tyre.
Përveç vendasve që marrin pjesë në festimin, mijëra vizitorë nga jashtë vendit vijnë në Shqipëri për të parë kulturën dhe traditat unike që janë pjesë e festimit të Ditës së Verës.
Më 14 Mars, të gjithë vendosin një Verore; një byzylyk tradicional i bërë nga dy fije të holla më ngjyrat e së kuqes dhe së bardhës. Gjatë festimit të Ditës së Verës, ka shumë festime të organizuara në vend, përfshirë një maratonë të qytetit, dhe në Parkun Rinia, në qytetin e Elbasanit, ndodh një shfaqje cirku. Pas shfaqjes së cirkut, shumë familje bëjnë ushqime të bollshme, mjaftueshëm për t’i ndarë me të tjerët. Një traditë tjetër është dhënia e ballokumeve; një gatim tradicional nga Elbasani. Të gjithë shqiptarët, dhe shumë vizitorë, takohen në qendër të qytetit dhe më pas nisen me miqtë dhe anëtarët e familjes në zona të bukura në qytet ose në restorante për të vazhduar festimin.
Por si mund ta ruajmë traditën për festimin e Ditës së Verës në kushtet kur jemi të izoluar?
Përgatitja e ushqimeve tradicionale të kësaj dite në shtëpi, do ju ndihmonte për të kaluar një ditë ndryshe dhe për të përcjellë energji pozitive tek vetja por dhe tek familjarët tuaj. Ju mund të shtroni ende një tavolinë të bukur e të mbushur plot ku mund të mblidheni me familjarët tuaj, por pa harruar që të ruani minimumin e distancës së sigurisë dhe të kujdeseni që gjatë kohës që jeni duke ngrënë të shmangni kontaktin me duar si dhe dezinfektimin sa më të shpeshtë të tyre.
Sigurisht që në kushte të zakonshme, Dita e Verës nuk do të kishte kuptim nëse do të festohej pa muzikë. Por duke qënë në kushte të jashtëzakonshme ju mund të gjeni forma të tjera alternative argëtimi. Mund të vendosni muzikë në sfond, dhe ta shijoni atë gjatë kohës që hani drekën/darkën ose mund edhe të kërceni por duke qenë larg njëri tjetrit dhe duke shmangur kërcimin e valleve tradicionale të cilat kërkojnë domosdoshmërisht kapjen e duarve.
Mendojini këto festime si një formë ndryshe e të festuarit nga vitet e tjera dhe padiskutim një nga Ditët e Verës, të cilën do ta mbani mend gjatë.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.