Si përkeqësimi i ekonomisë në Gjermani po e dërgon të gjithë eurozonën drejt stanjacionit

Kompanitë gjermane për herë të parë në 6 vite kanë shkurtuar më shumë numrin e vendeve të punës në krahasim me krijimin e tyre. Duke u bazuar në këto shifra nënvizohet fakti se si një “ngadalësim” në ekonominë më të madhe të BE-së, ka tërhequr nga pas edhe të gjithë eurozonën.

Pas 14 muajve të rënies së porosive nga jashtë dhe rënies së shitjeve përgjatë sektorit të manifakturës në tetor, ekonomia gjermane rrëshqiti në një prag recesioni, i cili po vazhdon me të njëjtin intensitet.

Analistët thonë se viti i gjatë i rënies në Gjermani ka tërhequr pas edhe 19 shtete anëtare të eurozonës drejt stanjacionit. Indeksi i përbërë për eurozonën u rrit në 50.2 në tetor, ku në krahasim me shtatorin është rritur me vetëm 0.1, e cila sinjalizon “zgjerimin e dytë më të vogël të ‘outputeve’ përgjatë manifakturës dhe shërbimeve, që nga viti 2013”.

Muajin e kaluar Banka Qendrore Europiane u detyrua të sillte në jetë programin e saj të stimulimit pas një rënie në inflacion dhe ngadalësim të GDP-së, që tregonin se eurozona po shkonte drejt një periudhe tkurrjeje.

Si një kundërpeshë për keqësimin në Gjermani, aktiviteti i biznesit u rrit në Francë, duke regjistruar zgjerimin e tretë më të madh në ‘outpute’ në 11 muaj.

Chris Williamson, shefi ekonomik i biznesit në ‘IHS Markit’, tha se indeksi i përbërë tregoi se ekonomia e eurozonës u rrit me vetëm 0.1% në korrik deri në shtator, duke rënë me 0.1% midis periudhës së Prillit dhe Qershorit.

Ai është shprehur se paqartësia e krijuar nga negociatat e Brexit, lufta tregtare midis Kinës dhe SHBA-së, si dhe ngadalësimi i ekonomisë globale janë të gjithë faktorë që po dëmtojnë ekonominë e eurozonës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.