Si të dalloni nëse jeni bërë i varur nga puna?! -Disa mënyra se si të kuroni veten

Padiskutim, që puna zë një pjesë të rëndësishme në jetën e gjithsecilit, dhe akoma më shumë për ata persona që e bëjnë punën e tyre me shumë pasion. Por si mund të dalloni nëse puna është shndërruar në gjithë jetën tuaj?! …Si fillim duhet t’i përgjigjeni pyetjeve më poshtë?!

Sa mendoni për punën tuaj jashtë zyrës? A konsumohet mendja juaj shpesh me mendime të lidhura me punën? A është e vështirë të marrësh pjesë në biseda me të tjerët që nuk kanë të bëjnë me punën tënde?

Si e përshkruan veten? Sa prej këtij përshkrimi është i lidhur në punën, titullin ose kompaninë tuaj? A ka ndonjë mënyrë tjetër që do ta përshkruanit veten? Sa shpejt u thoni njerëzve që sapo keni takuar për punën tuaj?

Ku e kalon pjesën më të madhe të kohës? A është ankuar dikush ndonjëherë për ju se shpenzoni shumë kohë në zyrë?

A keni hobi jashtë punës që nuk përfshijnë drejtpërdrejt aftësitë tuaja në lidhje me punën?

Si do të ndiheshit nëse nuk mund të vazhdonit të punonit më në profesionin tuaj dhe sa shqetësuese do të ishte kjo për ju?

Nëse këto pyetje ju bëjnë të shqetësoheni për shkallën në të cilën puna juaj ka ndikuar në identitetin tuaj, ka gjëra që mund të bëni për të filluar ndryshimin. Ju mund t’i realizoni këto vetë ose me ndihmën e një terapisti që kupton sfidat me të cilat përballen individët, karriera e të cilëve shoqërohet me presion të lartë.

Këshilla e parë, lidhet me delegimin e detyrave shtesë që ju keni në punë dhe ta shfrytëzoni kohën tuaj të lirë me aktivitete që nuk lidhen me punën. Kjo nënkupton se ju duhet të mbështeteni më shumë tek bashkëpunëtorët tuaj,ose  të punësoni një asistent për t’iu ndihmuar.

Përsa i përket aktiviteteve të reja jashtë punës, filloni me gjëra të vogla dhe provoni të praktikoni pasionet që keni. Ju nuk duhet të angazhoheni për asgjë afatgjatë; ideja është të filloni të eksploroni gjëra të reja që mund t’ju zgjojnë dëshirën për t’u rikthyer në jetën tuaj aktive pas punës, por njëkohësisht të riktheheni dhe në jetën tuaj normale.

Për shembull, nëse doni të ushtroheni më shumë, mos u regjistroni në palestër, por thjesht filloni të ecni ose të bëni një pushim gjatë drekës një ose dy herë në javë. Ndryshimet e vogla si kjo janë më të lehta për t’u përmirësuar dhe me kalimin e kohës mund të rezultojnë në një cikël të virtytshëm të përmirësimit dhe angazhimit tuaj në jetën personale.

Së dyti, fokusohuni të rindërtoni rrjetin tuaj. Krijoni sërish kontaktet me miqtë si dhe kaloni më shumë kohë me familjarët, duke rigjallëruar sërish jetën tuaj shoqërore por dhe atë familjare. Jo vetëm që do të përfundoni duke u argëtuar por gjithashtu do të krijoni një rrjet mbështetës për veten. Edhe thjesht krijimi i një komunikimi nëpërmjet telefonit apo mesazheve mund të ndihmojë në forcimin e marrëdhënieve. Nuk merr shumë kohë, pasi hulumtimet e fundit mbi miqësitë e të rriturve kanë treguar që të kesh vetëm tre ose pesë miq të ngushtë është e lidhur ngushtësisht me nivelet më të larta të kënaqësisë për jetën.

Së treti, përpiquni të vendosni se çfarë është e rëndësishme për ju. Vendosni dhe rishikoni parimet por dhe vlerat tuaja. Terapistët shpesh përdorin një proces të quajtur “Sqarimi i vlerave” për t’i ndihmuar pacientët e tyre të mendojnë përmes asaj që ka më shumë rëndësi për ta. Ky proces përfshin reflektimin e drejtimit tuaj në fusha si marrëdhëniet, karriera apo prindërimi. Pra, praktikisht mjafton të shikoni përtej titullit tuaj të punës.

Edhe nëse identifikimi i ngushtë me karrierën tuaj nuk është domosdoshmërisht i dëmshëm për ju, sërish ju jeni të rrezikuar nga prekja e një krize të dhimbshme identiteti nëse pushoheni nga puna ose thjesht dilni në pension. Individët në këto situata shpesh vuajnë nga ankthi, depresioni dhe dëshpërimi. Por nëse ju punoni përsëri ca kohë me veten duke diversifikuar aktivitetet dhe marrëdhëniet tuaja, ju mund të ndërtoni një identitet më të ekuilibruar dhe më të fortë në përputhje me vlerat që ju zotëroni.

Elefteria Zguri/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.