Si u rrit paraja në qarkullim në T2 – BSH: Mesatarisht, 33.6 miliard lekë të injektuara çdo ditë në sistem

“Në tremujorin e dytë të vitit 2020, ndërhyrjet e bankës së Shqipërisë në tregun e parasë konsistuan në operacione të tregut të hapur për injektim likuiditeti. Injektimi mesatar ditor nëpërmjet operacioneve injektuese të likuiditetit me maturim 1-13 javë, ka qenë 33.63 miliardë lekë kundrejt 27.34 miliardëve lekë në 3-mujorin e mëparshëm dhe 26.88 miliardë lekë në 3-mujorin e dytë të vitit 2019”-thotë banka e Shqipërisë, duke shtuar se: “Kërkesa e bankave për likuiditet në operacionet e Bankës së Shqipërisë ka qenë afër 32.00 miliardë lekë në fillim të periudhës dhe 34.00 miliardë lekë në fund të periudhës, duke u luhatur në intervalin 29-38 miliardë lekë dhe me tendencë rritëse, kryesisht për shkak të tendencës së bankave për të rritur likuiditetin e tepërt dhe efektit të rritjes së parasë në qarkullim”.

Në vijim të prirjes së evidentuar prej muajit shkurt, paraja në qarkullim ka qenë faktori kryesor që ka ndikuar në rritjen e nevojës së bankave për likuiditet. Pasi është rritur në periudhën shkurt-mars me 9.02 miliardë lekë, në 3-mujorin e dytë të vitit, paraja në qarkullim është rritur me 22.20 miliardë lekë. Faktor me ndikim pozitiv në likuiditetin e sistemit bankar dhe që ka zbutur presionin për kërkesë të lartë të bankave për likuiditet kanë qenë operacionet e tjera të Bankës së Shqipërisë si, rritja e marrëveshjeve SËAP me MFE për rreth 19.50 miliardë lekë, blerja nga BERZH e 49 milionë Euro, si dhe rritja e portofolit te bonove të thesarit me 6.90 miliardë lekë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.