Siguria e pistës së aeroportit të Rinasit! Vijnë në Tiranë 6 ekspertët e organizatës ndërkombëtare. Në fund të misionit, raport i posaçëm
Ekspertët e sigurisë së pistave të aeroporteve nga Organizata Ndërkombëtare e Aviacionit Civil (ICAO) ndodhen në Tiranë për të kontrolluar pistën e aeroportit ndërkombëtar Nënë Tereza në Rinas. Referuar njoftimit zyrtar të Autoritetit të Aviacionit Civil janë 6 ekspertë që përgjatë 4 ditëve do të zbërthejnë të gjithë zinxhirin përbërës të dokumentacionit, programeve, planeve, zbatimin e rregullave, analizimin e rreziqeve, zgjidhja e tyre etj. në lidhje me sigurinë në operim të pistës (Runëay Safety).
“Në fund të kësaj vizite do kemi një raport të detajuar me hapa konkret për të garantuar që standarti më i lartë ndërkombëtar është duke u zbatuar edhe në Rinas” njofton AAC.
Po ashtu,AAC evidenton projektin që është duke u zhvilluar në Rinas në lidhje me pistën dhe rrugët lidhëse të saj, i quajtur “Airfield 2020”.
“Ky projekt ka filluar para një viti dhe konsiston në ribërjen e rrugëve lidhëse të pistës dhe do të përfundojë këtë vit me riveshjen totale të pistës me asfalt.
Duke qenë se kemi vetëm një aeroport ndërkombëtar, me vetëm një pistë, procesi i ribërjes së pistës është një ngjarje jo e zakonshme, që përsëritet një herë në 20 vjet në vendin tonë (hera e fundit ka qenë viti 1998), dhe e cila kërkon një nivel ekspertize të lartë nga të gjithë palët e përfshira.
Veçanërisht në 2020, ku kemi 300% e më shumë pasagjer sesa 20 vite më parë, është e rëndësishme që çdo gjë të shkojë sipas planeve dhe praktikave më të mira ndërkombëtare. Prandaj dhe vizita e ekspertëve të huaj është kaq e rëndësishme për ne në këtë moment” shkruhet në njoftimin e AAC-së.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.