Siguria e vaksinës për covid-19 – Deputetët: S’ka vend për dyshime, ka grupe që po punojnë për frenimin e procesit

Deputetët e Komisionit parlamentar të Shëndetësisë kanë theksuar nevojën për dhënien e mesazheve të duhura në drejtim të sigurisë së vaksinës për COVID-19. Në mbledhjen e parë për këtë vit, ata e vunë theksin se nuk ka vend për dyshime në drejtim të vaksinës së Pfizer, që ka mbërritur në vendin tonë dhe mënyrës sesi ajo është ruajtur gjatë transportimit.

Sipas deputetes Klodiana Spahiu grupe të caktuar, po punojnë për frenuar qytetarët në kryerjen e vaksinës.

Vendi ynë e nisi vaksinimin kundër COVID-19 në datën 11 janar, me 975 doza të dedikuara për mjekët dhe infermierët e spitaleve COVID. Ndërkaq, zyrtarisht është deklaruar se pritet ardhja e 2000 dozave të tjera që do të jenë dhuratë nga 1 vend i Bashkimit Evropian, si dhe 10 750 dozat e para, si pjesë  e marrëveshjes që qeveria ka arritur me kompaninë Pfizer.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.