Siguria nga Ligji dhe rendi – Shqipëria renditet e 64-ta nga 142 vende, në rajon kalon vetëm Maqedoninë
Shqiptarët ndihen përgjithësisht të sigurt nga mbështetja e forcave të ruajtjes rendit, megjithatë më pak se në vendet e tjera të rajonit.
Të dhënat vijnë nga indeksi i Ligjit dhe Rendit për vitin 2016, ku në një sondazh, njerëzit u janë përgjigjur pyetjeve nëse kanë besim te forcat e rendit, nëse ndihen të rrezikuar të ecin vetëm natën në zonën ku jetojnë, apo nëse janë grabitur gjatë 12 muajve të fundit.
Në renditjen e shteteve sipas pikëve të marra, Shqipëria pozicionohet e 64-ta me 79 pikë, kundrejt mesatares prej 80 pikësh të vendeve të Europës Lindore, e cila ka një rritje me dy pikë nga viti i kaluar.
Me të njëjtin rezultat me vendin tonë, renditen edhe vende si India dhe Kazakistani, ndërsa me një rezultat më të dobët janë vende të Bashkimit Europian si: Greqia, Hungaria, Rumania dhe Bullgaria.
Në këtë indeks përfshihen edhe vendet fqinje si Kosova, e cila renditet e 22-ta, me 85 pikë, në një nivel me shtete si Mbretëria e Bashkuar, Shtetet e Bashkuara apo Suedia.
Edhe vendet e tjera të rajoni performojnë mjaft mirë dhe mbi mesataren: Bosnje dhe Hercegovina zë vendin e 32-të me 84 pikë, Kroacia dhe Serbia zënë vendin e 37-të me 83 pikë, ndërsa Mali i Zi me 81 pikë renditet i 46-ti.
Më pak të sigurt se në Shqipëri ndihen vetëm Maqedonasit me 75 pikë.
Sipas mesatares së rajonit të Europës Lindore, vetëm 3% e të anketuarve janë përgjigjur se janë grabitur ose sulmuar vitin e fundit, përqindje kjo më e ulët edhe se vendet e Europës Perëndimore dhe e ngjashme me SHBA dhe Kanadanë.
Në krye të indeksit si vendet më të sigurta qëndrojnë Singapori me 97 pikë, Uzbekistani me 95 pikë e Islanda me 92 pikë. Mbyll tabelën Venezuela me 42 pikë, ku vetëm 12% e të pyeturve u shprehën se ndihen të sigurt.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.