Siguria rrugore, 134 masa ndëshkuese – Mjetet e braktisura të lirojnë hapësirat
134 masa ndëshkuese janë vendosur nga Policia Rrugore e Tiranës në 24 orët e fundit gjatë aksionit për rritjen e parametrave të sigurisë rrugore nga të cilat 75 për parkime të gabuara, 45 për qarkullim në korsitë e dedikuara për shërbimin publik dhe 14 gjoba për mosdhënie përparësie këmbësorëve.
Policia ka zhvilluar kontrolle me shërbime të shtuara për një qarkullim normal në akset rrugore urbane si dhe pas ankesave të herëpashershme të banorëve, për vështirësinë në qarkullimin normal të mjeteve zjarrfikëse dhe atyre të autoambulancave në zonat e banimit.
Kontrollet vijuan për evidentimin dhe ndëshkimin e përdoruesve të rrugës që nuk respektojnë sinjalistikën rrugore, duke krijuar konfuzion dhe vështirësi në qarkullim, kryesisht në oraret e mëngjesit.
Gjithashtu, Policia Rrugore e Tiranës, në bashkëpunim me Policinë Bashkiake, ka nisur fazën e evidentimit dhe njoftimit të pronarëve të mjeteve, që kanë zënë për një kohë të gjatë hapësirat publike, mjetet dukshëm të braktisura apo ata që shfrytëzojnë hapësirën publike për tregje shitjeje, duke u lënë njoftimin me afatin e përcaktuar, për të marrë masa për heqjen e tyre nga rruga.
Janë njoftuar 125 pronarë mjetesh dukshëm të braktisura ose të vendosura për shitje në hapësirat publike, që të lirojnë hapësirën e zënë brenda 15 ditësh. Në të kundërt do t’i nënshtrohen sanksioneve ligjore që parashikon Kodi Rrugor i Republikës së Shqipërisë.
Gjithashtu janë arrestuar shtetas, për drejtim mjeti në gjendje të dehur. Policia apelon që të respektohen rregullat e qarkullimit rrugor, pasi kontrollet dhe masat do të jenë të ashpra.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.