Siguria ushqimore, Peleshi takim me peshkatarët: Vërtetimi i origjinës kusht për çdo njësi tregtare

“Tregu i peshkimit duhet të formalizohet dhe të futet në sistem kontrolli”, tha ministri i Bujqësisë Niko Peleshi, si kusht për të garantuar sigurinë ushqimore dhe për të marr më shumë mbështetje financiare nga shteti.

“M’u prezantua shqetësimi i parë, që ka lidhje me formalizimin dhe futjen në një sistem kontrolli të peshkimit këtu. Peshku, peshkohet në liqen, pastaj nga peshkimi deri tek tregtimi, hallkat nuk funksionojnë siç duhet. Nuk ka një kontroll, qoftë të sigurisë ushqimore, por qoftë edhe i vërtetimit të origjinës, që duhet të jetë kusht, për çdo njësi tregtare të peshkut. Unë jua premtoj, që këtë rrugë të sigurisë ushqimore dhe të disiplinimit, por mbi të gjitha, të energjizimit të sektorit, ne të mos tërhiqemi”, tha Peleshi në një takim me peshkatarët e Shirokës në Shkodër.

Peleshi tha se nuk do të mungojë mbështetja financiare për të gjitha ata që punojnë konform rregullave tregtare.

“Gjithsesi, në qoftë se duhen mbështetje të tjera, investime, brenda mundësive që kemi, që këtë vit do t’i kemi më të shumta, ne jemi të gatshëm t’ju mbështesim. Do të kemi në fakt, skemën e mbështetjes financiare për gjithë sektorin, pothuajse dyfish më të madhe, se në të kaluarën. Janë rreth 2.6 miliard lekë, të themi rreth 20 milionë euro. Akoma nuk i kemi të detajuara, dhe nuk e di, si do t’i përfitojë peshkimi përmes kësaj skeme, por me siguri kemi dhe programe të tjera, me partnerët tanë, me Kooperacionin Italian, Bashkimin Evropian. IPARD-i do të fillojë shumë shpejt, kështu që, mundësinë financiare për të mbështetur e kemi. Unë e di, që askush nuk mendon të rritet, në qoftë se ka probleme”.

Ministri Peleshi ka përmendur ndër të tjera dhe lehtësirat, që i  janë krijuar këtij sektori, siç është heqja e TVSH-së për rrjetat dhe për 52 artikuj të mjeteve të bordit të peshkimit.

“Ne bëmë një masë, që më shumë, peshkatarëve të detit u vlen besoj, mbase pjesërisht dhe juve, që është heqja e TVSH – së për rrjetat dhe për 52 artikuj të mjeteve të bordit. Peshkatarët e detit që i kam takuar, më kanë thënë, që kjo është një masë shumë e mirë. Do vazhdojmë edhe më tej, me gjithë incentivat, apo lehtësirat fiskale, që mund t’ju krijojmë”.

 SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.