Sigurimet, 6.4 miliard lekë dëme pezull – Vlera e tyre kalon me 2.3 herë atë të dëmeve të paguara
Kompanitë shqiptare të sigurimeve kishin mbi 6.4 miliardë lekë ose 52 milionë euro dëme pezull në mesin e këtij viti. Sipas të dhënave nga Autoriteti i Mbikëqyrjes Financiare, kjo shumë përfshin vlerën e dëmeve në proces vlerësimi, të dëmeve të miratuara, por të papaguara, si edhe dëmet që janë objekt i çështjeve gjyqësore.
Megjithëse vlera e dëmeve pezull ka rënë me gati 20% krahasuar me të njëjtën periudhë të një viti më parë, vlera e tyre është 2.3 herë më e lartë se ajo e dëmeve të paguara nga shoqëritë e sigurimeve në 6-mujorin e parë të këtij viti.
Nëse këto dëme do të miratoheshin dhe do të paguheshin të gjitha, vlera totale e dëmeve do të tejkalonte ndjeshëm atë të primeve në fund të 6-mujorit të parë të vitit.
Rreth 1 miliardë lekë ose 16% e shumës totale të dëmeve pezull i takojnë Fondit të Kompensimit të Byrosë Shqiptare të Sigurimeve, që ka detyrë të zhdëmtojë viktimat e dëmeve nga mjete të pasiguruara ose me autorë të panjohur.
Pas presionit që AMF po ushtron prej më shumë se dy vitesh, pagesa e dëmeve nga Fondi i Kompensimit është zhbllokuar dhe që nga fillimi i vitit 2017 janë paguar mbi dy miliardë lekë dëme.
Megjithatë, vlera e dëmeve pezull ngelet mjaft e lartë dhe ecuria e shlyerjes së tyre paraqitet problematike. Gjatë inspektimeve të kryera në Byronë e Sigurimeve, këtë vit AMF ka konstatuar zvarritje në shpërndarjen te shoqëritë e sigurimit të praktikave të dëmeve të detyrueshme për t’u ekzekutuar.
Për këtë arsye, AMF ka paralajmëruar me shkarkim nga detyra drejtoren ekzekutive të Byrosë Shqiptare të Sigurimeve, Anila Hoxha.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.