Sigurimet, AMF “ul traun” – Refuzon aplikimin e dytë për licencë brenda tre muajve
Bordi Drejtues i Autoritetit të Mbikëqyrjes Financiare ka refuzuar aplikimin shoqërisë Progressig për t’u licencuar në veprimtarinë e sigurimit në klasat e jo-jetës. Ky është i dyti aplikim që AMF-ja rrëzon gjatë këtij viti. Në fillim të muajit mars, iu refuzua licenca edhe shoqërisë kosovare, Dukagjini, që donte të zgjeronte aktivitetin në Shqipëri.
Në të dyja rastet, arsyeja kryesore e refuzimit të licencave është mosrespektimi i kërkesave ligjore për kapitalin fillestar. Sipas përcaktimeve të ligjit “Për veprimtarinë e sigurimit dhe risigurimit”, kapitali fillestar i shoqërisë së sigurimit nuk mund të jetë më i ulët se 370 milionë lekë. Kjo shumë duhet bllokuar para licencimit në një llogari të veçantë garancie pranë një banke tregtare. Gjithashtu, aplikuesit i kërkohet një garanci shtesë në masën 5% të kapitalit fillestar, për të mbuluar shpenzimet e nisjes së veprimtarisë së kompanisë. Sipas vendimit të Bordit të AMF-së, Progressig nuk ka arritur të vërtetojë përmbushjen e garancive të kërkuara financiare.
Me të njëjtin argumentin, Bordi i AMF-së refuzoi në muajin mars edhe aplikimin e kompanisë kosovare të sigurimeve Dukagjini. Dukagjini ka qenë e pranishme në tregun shqiptar të sigurimeve për një periudhë të shkurtër, që nga shtatori 2004 deri në fund të vitit 2005. Në dhjetor 2005, dega shqiptare u ble nga biznesmeni shqiptar Kadri Morina dhe kompania ndryshoi emrin në Eurosig.
Licenca e fundit për veprimtari të sigurimeve në Shqipëri është dhënë në qershor të vitit 2012, për kompaninë Ansig. Ndërkohë, në dy vitet e fundit ka një rikthim të interesit për të investuar në tregun e sigurimeve, megjithëse bëhet fjalë kryesisht për investitorë lokalë ose rajonalë. Por, tashmë, AMF po ndjek një linjë të rreptë për përmbushjen e kritereve ligjore nga investitorët e interesuar.
Tregu i sigurimeve edhe në kushtet aktuale ngelet problematik, sidomos në segmentin e jo-jetës. Mbështetur në të dhënat e AMF-së, tre prej kompanive të sigurimit të jo-jetës kanë një kapitalizim poshtë pragut ligjor të kërkuar.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.