Sigurimet shoqërore, masa e kontributeve për bashkëshortët e diplomatëve. Hyn në fuqi vendimi, periudhat që njihen për pensione

Hyn në fuqi vendimi i qeverisë për masën e kontributeve të sigurimeve shoqërore, si dhe periudhat që njihen si kontribute për bashkëshortët, të cilët kanë shoqëruar personelin e shërbimit të jashtëm në misionin diplomatik ose postin konsullor jashtë shtetit. Ndërkohë sipas vendimit të fundit, fondi financiar për pagesën e kontributit të sigurimeve shoqërore përballohet nga buxheti i Ministrisë së Punëve të Jashtme, ndërsa efektet financiare të këtij vendimi fillojnë nga 1 janari 2018.

Ministria e Punëve të Jashtme, në bazë të listës së bashkëshortëve që kanë shoqëruar personelin e shërbimit të jashtëm në misionet diplomatike ose postet konsullore të Republikës së Shqipërisë në shtetet e huaja, do të bëjë pagesën e kontributeve të sigurimeve shoqërore të paderdhura, si më poshtë vijon:

a) Për periudhën 1 janar 1998 deri më 31 dhjetor 2015, pagesa të mbulohet me kontribute vetëm nga dega e pensioneve, ndërsa për periudhën 1 janar 2016 deri më 31 dhjetor 2016 pagesa të mbulohet me kontribute të të gjitha degëve të sigurimit shoqëror, bazuar në normën e kontributit sipas degëve të sigurimit, të përcaktuar në dispozitat e ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.

b) Masa e kontributit të sigurimeve shoqërore për personat përfitues, për periudhën 1 janar 1998 deri më 31 dhjetor 2015, të llogaritet në bazë të pagës minimale në shkallë vendi, përcaktuar me vendim të Këshillit të Ministrave, në fuqi për vitin 2016, ndërsa për periudhën 1 dhjetor 2016 deri më 31 dhjetor 2016, bazuar në pagën që përfituesi kishte përpara ndërprerjes së punës. Në rastet kur përfituesi nuk ka qenë i punësuar, kontributet e sigurimeve shoqërore llogariten bazuar në pagën minimale në shkallë vendi në fuqi për vitin 2016.

c) Pagesa e kontributeve të bëhet drejtpërdrejt për llogari të Institutit të Sigurimeve Shoqërore. Mënyra e pagesës së kontributeve, llogaritë bankare ku do të kryhen transfertat dhe dokumentacioni që pasqyron kontributet individuale caktohen me udhëzim të përbashkët të Ministrisë së Punëve të Jashtme dhe Institutit të Sigurimeve Shoqërore. Lista e personave që përfitojnë këtë trajtim, sipas viteve, do të jetë pjesë e udhëzimit dhe do të arkivohet në arkivat e Institutit te Sigurimeve Shoqërore.

Drejtoria Rajonale e Sigurimeve Shoqërore, në bazë të listë-pagesave të paraqitura nga Ministria e Punëve të Jashtme, do të bëjë njohjen e periudhave të paguara sipas këtij vendimi, si periudhë sigurimi për bashkëshortin e personelit të shërbimit të jashtëm.

Për efekt të këtij vendimi, bashkëshort i personelit të shërbimit të jashtëm, është:

a) bashkëshorti/ja që ka shoqëruar personelin diplomatik në misionet diplomatike ose postet konsullore të Republikës së Shqipërisë në shtetet e huaja;

b) bashkëshorti/ja që ka shoqëruar personelin administrativo-teknik në misionet diplomatike ose postet konsullore të Republikës së Shqipërisë në shtetet e huaja, pa përfshirë personelin teknik vendas.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.