Sigurimi i fatkeqësive – Shqiptarët, vetëm katër euro prime për frymë
Ndërkohë që Drejtoria e Emergjencave Civile ka paralajmëruar një rrezik të lartë përmbytjesh në disa qarqe të vendit, sigurimi i shqiptarëve ndaj fatkeqësive natyrore është në vlera të papërfillshme.
Sipas të dhënave nga Autoriteti i Mbikëqyrjes Financiare, për 10-mujorin e këtij viti, totali i sigurimeve në klasat e sigurimit kundër fatkeqësive natyrore dhe dëmeve të tjera në pronë ishte më pak se 1.6 miliardë lekë ose 11.9 milionë euro.
Si raport i primeve të sigurimit për frymë, mund të llogaritet se çdo shqiptar paguan mesatarisht pak më shumë se 4 euro për të siguruar pronën nga fatkeqësitë.
Vlera e primit të sigurimit për këto klasa të sigurimit këtë vit ka regjistruar një rritje prej 4.4%, e papërfillshme, po të kemi parasysh vlerat absolute ku ndodhen të ardhurat nga ky produkt. Shifrat janë modeste edhe të llogaritura si numër kontratash sigurimi. Për 10 muaj, u nënshkruan më pak se 33 mijë kontrata sigurimi, në rënie me afro 9% krahasuar me të njëjtën periudhë të një viti më parë.
Me këto shifra, llogaritet se vetëm 1.1% e shqiptarëve kanë një sigurim kundër dëmeve në pronë. Këto të dhëna dëshmojnë qartë se ekonomia e familjeve shqiptare është tejet e ekspozuar ndaj fatkeqësive natyrore.
Kultura e dobët e sigurimit dhe niveli i ulët i të ardhurave identifikohen si pengesat madhore për të rritjen e sigurimeve vullnetare në Shqipëri. Për këtë arsye, prej vitesh po diskutohet ngritja e një skeme të sigurimit ndaj fatkeqësive përmes një ligji të veçantë. Megjithatë, nisma e ndërmarrë me shtysën e fortë të Bankës Botërore ende nuk ka ndonjë rezultat konkret.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.