Sigurimi i detyrueshëm – Odiseja e ligjit të ri nuk ka të mbaruar
Odiseja e ndryshimit të ligjit për sigurimin e detyrueshëm nuk të mbaruar. Megjithëse procesi i ndryshimit të ligjit ka nisur prej vitesh, ende nuk ka një projektligj të dërguar për miratim në Kuvendin e Shqipërisë.
Qysh në vitin 2016, Autoriteti i Mbikëqyrjes Financiare përgatiti një projektligj, i cili qëndroi pezull për gati dy vjet dhe nuk gjeti dakordësinë e qeverisë. Në maj të vitit të kaluar, pas ndryshimeve në drejtimin e AMF-së, u përgatit një projektligj i ri.
Megjithatë, Ministria e Financave, institucioni që ka kompetencën ligjore për ta propozuar projektligjin, nuk e ka dërguar atë ende në parlament. Zvarritja mund të lidhet me kundërshtimet që kanë shprehur kompanitë e sigurimeve ndaj draftit të përgatitur nga AMF.
Ligji në fjalë është shumë i rëndësishëm për rregullimin e segmentit më të rëndësishëm të tregut të sigurimeve, atë të përgjegjësive motorike ndaj palëve të treta.
Sigurimi i brendshëm motorik sjell më shumë se gjysmën e primeve të arkëtuara nga kompanitë shqiptare të sigurimeve.
Ligji i ri do të mundësojë aplikimin e sistemit bonus-malus, sipas të cilit primet e sigurimit të detyrueshëm të mjeteve do të paguhen në bazë të historikut të dëmeve.
Projektligji gjithashtu parashikon se primet e sigurimit të detyrueshëm motorik duhet të miratohen nga AMF dhe nuk mund të ndryshojnë më shpesh se dy herë në vit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.