Sigurimi i mjeteve – Çmimi do të varet nga dëmet, fuqia e mjetit dhe vendndodhja
Bordi Drejtues i Autoritetit të Mbikëqyrjes Financiare miratoi të mërkurën udhëzimin për përdorimin e sistemit bonus-malus në sigurimin e detyrueshëm motorik, për përgjegjësitë ndaj palëve të treta.
Udhëzimi përcakton kriteret mbi bazën e të cilave kompanitë do të llogarisin primin e sigurimit që do të paguajë çdo zotërues mjeti. Kriteret kryesore që do të jenë historiku i dëmeve i drejtuesit, fuqia motorike e mjetit dhe territori ku ai qarkullon. Krijimi i historikut për vënien në zbatim të sistemit bonus-malus do të fillojë më 1 prill 2019, ndërsa efekti te çmimi i siguracioneve do të nisë pas një viti, në prill 2020.
Sistemi bonus-malus penalizon me rritjen e primit deri në dy herë më shumë të siguruarin që ka shkaktuar aksidente. Përkundrazi, drejtuesit që nuk kanë shkaktuar dëme përfitojnë ulje të primit të sigurimit deri në përgjysmimin e tij. Sipas AMF-së, në vendet ku është në zbatim, ky sistem ka dhënë efekte në uljen e numrit të aksidenteve, mbrojtjen e jetës së qytetarëve dhe garantimin e një çmimi më të drejtë për policat e sigurimit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.