Sigurimi i jetës – Tregu rritet me 23%, arrin në 9 milionë euro
Tregu i sigurimit të jetë u rrit me 23% për vitin 2017. Të dhënat e Autoritetit të Mbikëqyrjes Financiare, tregojnë se ky segment i tregut u rrit me ritme ndjeshëm më të mira krahasuar me sigurimin e jo-jetës.
Në total, sigurimi i jetës për vitin 2017 pati një volum primesh në vlerën e 1.2 miliardë lekëve ose rreth 9 milionë eurove.
Siç tregojnë shifrat, në vlerë absolute tregu i sigurimit të jetës vazhdon të ketë përmasa modeste dhe zë vetëm 7% të tregut gjithsesi të vogël të sigurimeve. Sipas statistikave, shtysa kryesore në rritjen e vitit 2017 erdhi sidomos nga kontratat e lidhura me produktet bankare dhe kryesisht nga sigurimi i jetës së debitorëve.
Të ardhurat nga sigurimi i jetës së debitorëve u rritën me 38% krahasuar me një vit më parë, çka dëshmon se, tërthorazi, ecuria e kredisë së re gjatë vitit 2017 ka qenë më e mirë.
Jeta e debitorit sjell rreth 60% të primeve totale që arkëtojnë kompanitë e sigurimit të jetës. Megjithatë, siç mund të kuptohet qartë, ky është në fakt një produkt praktikisht i detyrueshëm, si kusht i vendosur nga banka për dhënien e kredive bankare afatgjata.
Rrjedhimisht, produktet e mirëfillta të sigurimit vullnetar të jetës ngelen në vlera të papërfillshme. Në tregjet e zhvilluara, produktet e jetës kanë një peshë dominuese në tregun e sigurimeve. Në Shqipëri, primet e sigurimit te jetës janë mesatarisht vetëm 3 euro për frymë në vit.
Ky është një tjetër tregues i zhvillimit shumë të dobët të tregut dhe i mungesës së një kulture sigurimesh në shoqëri.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.