Sipërmarrësi i turizmit dhe investimeve në Korenë e Veriut dënohet me 11 vjet burg për spiunazh në Kinë

Një gjykatë kineze ka dënuar një kanadez, të akuzuar për spiunazh, me 11 vjet burg, në një rast të lidhur me fushatën e presionit të Pekinit kundër qeverisë kanadeze për arrestimin e një ekzekutivi në gjigantin e teknologjisë Huawei.

Sipërmarrësi Michael Spavor u dënua të Mërkurën dhe është një nga një numër kanadezësh të ndaluar në Kinë në atë që kritikët thonë se është “politikë pengjesh” pas arrestimit të ekzekutivit të Huawei në 2018.

Kryeministri kanadez Justin Trudeau denoncoi dënimin “krejtësisht të papranueshëm dhe të padrejtë”.

“Vendimi i sotëm për Spavor vjen pas më shumë se dy vjet e gjysmë paraburgimi arbitrar, mungesës së transparencës në procesin gjyqësor dhe një gjykimi që nuk arriti të përmbushë as standardet minimale të kërkuara nga e drejta ndërkombëtare,” tha ai në një deklaratë.

Një gjykatë kanadeze do të dëgjojë argumentet përfundimtare në javët e ardhshme nëse do të dorëzojë ekzekutivin, Meng Wanzhou, për t’u përballur me akuzat penale amerikane në lidhje me shkeljet e mundshme të sanksioneve tregtare ndaj Iranit.

Spavor ishte i bazuar në Kinë, por kishte lidhje të gjera me Korenë e Veriut në turizëm dhe sipërmarrje të tjera tregtare që e sollën atë në kontakt me udhëheqjen e shtetit të izoluar komunist. (EN)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.